Pajau Media Channel
July 16, 2024
Putao ginwang kata nga ai N dup Yang hpyen yen dabang kaw n dai laman Hka li Tukkwi machyi ai masha law wa ai hte July 16 ya shani asak ram ai ramma langai mung hkali machyi sawng nna asak si sum mat ai re lam chye lu ai.
“Ndai bat laman kaw nna dabang kata machyi ai masha grai law wa ai, mi sha mung hkali machyi sawng ai masum ya daram rai sai asak 25 ning re ai ap nawng sara num langai hka li machyi sawng nna n nga mat sai, tsi mawan gaw n hkum machyi makaw gaw law rai nna yak hkak nga ai, tsi gawk kaw hkali jep ai hta tsi mawan n hkum ai, kadai mung kadai chye ai ladat hte sang hpaw lap ni htu lu rai nna tsi la nga ga ai, n kau mi mai yang n mai mi bai hpang rai machyi masha grai law nga sai” nga nna N dup Yang hpyen yen dabang lithkam tsun ai re.
Shaning shagu lanam ladaw hta machyi makaw law ai re majaw lit nga ai asuya kaw nna mung lanam ladaw ji grawng tsi gat ya na matu hpyi shawn da ai raitim nlu galaw ya majaw shaning shagu lanam ladaw machyi makaw grai law ai masa hpe matut tsun ai re.
“Lanam ta shata man kru, sanit, matsat laman gaw ji grawng grai law ai re majaw dabang kata Ji grawng tsi gat ai lam galaw ya na matu lang hte lang tang madun ai re wa n gat ya, shaning shagu machyi makaw grai law ai, ya she hpang wa ai re kade she naw machyi wa na kun pyi nchye sai ”
N htan Zup, N dup Yang hpyen yen dabang hta shaning shagu lanam ladaw Hkali, Tukkwi machyi ai masha law nga wa ai re, Hkali machyi ai masha ni mung numdaw mi mai yang numdaw mi bai machyi re ai masa re nga nna tsun ai re. Ndup Yang hpyen yen dabang kaw hpyen yen mung masha htinggaw 92 mung masha 473 shanu nga ai re, dai hpyen koi yen mung masha ni gaw lai wa sai 2015 July shata kaw kaw Lawt mai yang mali hka Mayan gasat gala majan a majaw koi yen wa ai hpyen yen mung masha ni re hpe mung chye lu ai.
Comentários