N Dai Laman Waimaw Ginra Mayan P.T.Ts Hpung Ni Masha Lahkawn Ai Lam Grau Galaw Wa

Pajau Media Channel

Waimaw ginra hta n dai laman myo mare lawk hkan P.T.Ts hpung ni kaw nna masha rim lahkawn ai lam ni grai galaw wa ai majaw Mung mare masha ni grai hkrit tsang nga ma ai lam ginra masha ni tsun ai kaw na chye lu ai.

P.T.Ts hpung de tinang a myit hte shang wa na lam, n shang wa yang hkan rim, lahkawn na re lam Oct (30) shani Waimaw Ginra nga P.T.Ts hpung ni n dau laika shapraw ai hpang kaw nna Waimaw Ginra hte Myo mare kaba hkan nga ai ramma ni dum nta kaw n gwi nga hprawng hkawm ra ai madang byin ai gaw ya aten du hkra re, ya na zawn atik anang rim lahkawn nga ai lam hte seng nna shinggyim Uhpung uhpawng ni hte Lisu Ramma wuhpung wuhpawng ni kawn ninghkap da ai re.

P.T.Ts hpung ni gaw mung shawa yawng a akyu ara hta shawng lawm ai wuhpawng nre majaw n kam shang lawm ai, ya na zawn atik anang P.T.Ts shang galaw ra ai nga nna n dau da ai lam hpe bai dawm kau na matu Mung masha law malawng hpyi shawn nga ma ai re hte tinang dum nta kaw nga tim shimlam n lu ai re hpe mung chye lu ai.

Ya na zawn rim lahkawn ai lam hpe Waimaw ginra hta Lisu ramma ni kawn mung tsun ninghkap da ai hta Atik Anang hpyen lahkawn ai lam hpe jahkring ya na lam, atik anang rim hkrum ai Lisu ramma ni hpe mung bai dat ya na lam, Lisu P.T.Ts hpung ningbaw gaw Lisu amyu sha yawng hte seng ai, Lisu amyu ni a gawng malai tai ai wa n re majaw ninghkap ai lam ni tsun n dau ai lam ni mung nga ai re. Lisu Association Australia kawn mung U Shwe Min Ningbaw ai P.T.Ts kawn tsun n dau da ai hpe ninghkap n ra sharawng ai lam Lisu laika hte Myen laika hku ka n na sumla ni hte hpawn tara shang n dau da ai hpe mung chye lu ai.

Sumla - Myitkyina News Journal