Pajau Media
25.3.2025
Myen hpyen dap hte KIA pawng hpawm hpung ni gaw ya aten Manmaw ginra, Hpakant lam, Waimaw Lamyang hkan gasat gala byin nga nna Myen hpyen dap kawn hpyen n-gun jat shamu shamawt dingyang re hte Myitkyina muklum shinggan hkan mung shara la nna lai wa lai sa ni hpe san jep shamu shamawt nga ai lam chye lu ai.
Myen hpyen dap masha ni gaw ya aten Myitkyina muklum hte loi tsan ai Nammati ginra, Chyarapati, Mile 10 lahta zawn re ai shara ni hkan shawoi na hta grau shamu shamawt san jep ai lam ni galaw wa ai masa hpe ginra masha langai tsun ai re.
“Ya gaw jut shara shagu hkan lama ma sin ai zawn re na tsap nga ma ai. Myitkyina Chyarapati lam kaw mung lai wa lai sa ni hpe jep ai. Ma ba na hkawm ai kanu num ni hpe du hkra jep ai. Mani mana hkan na gaw Nawng Nang lahta de mung grai bai shamu wa ai da,” nga nna ginra masha ni tsun ai.
Nammati ginra hta mung lai wa sai Febuary shata daram kaw nna ya aten du hkra Myen hpyen dap kawn hpyen masa shamu shamawt nga ai re hte hpyen lahkawn ai lam ni galaw nga ai lam ginra masha ni tsun nga ma ai re.
Jinghpaw mung kata gasat gala majan gaw laja nga dingyang re hta ya na zawn Myitkyina makau grup yin hkan Myen hpyen dap masha ni shara la wa ai gaw hpyen masa sawng wa na re majaw mung masha ni hpe makawp ninggang shatai wa mai ai lam mung masa salang ni tsun maram nga ma ai re.
N dai laman shana aten sinat kaba n sen ni dingyang ngoi kadu wa ai rai nna mung masha ni grai hkrit tsang nga ma ai re. Myen hpyen dap gaw mung shawa hte hpyen hpe ginhka ai lam n nga gasat nga ai majaw nbungli bawm, Drone bawm ni hpe koi yen lu na matu shim ai kaduk ni htu shajin ra ai lam myit su salang ni kawn tsun sadi jaw nga ai hpe chye lu ai.
Shiga – Pyilan U
Comments