N dai Laman Gasat Gala Majan Zim Nga Ai Danai Muklum Hte Lido Lam Mayan Myen Hpyen Dap Shamu Shamawt Lam Grai Galaw Wa Ai Lam

Pajau Media

11.10.2024

Myen hpyen dap gaw ra lata poi a matu tau hkyen ai hku nna Yup Tung jahpan laja lana hta nga ai re hte Jinghpaw mung Danai ginra hta mung n dai laman Yup Tung jahpan hta masing hte muklum kata Myen hpyen dap masha ni shamu shamawt hkawm ai lam shawoi na hta grau galaw wa ai re lam chye lu ai.

Yup Tung jahpan hta ai lam hpe Myen mungdan ting kaw October 1 kaw nna 15 ya du hkra hta na matu masat da ai rai nna ya aten Danai ginra hta gaw law malawng hta gahkyin ngut ai daram rai wa sai hpe mung chye lu ai. Myen hpyen dap gaw Yup Tung jahpan hta shamu shamawt hkawm ai aten masha rim ai lam ni mung galaw ai re hpe mugn chye lu ai.

Danai Muklum kaw October 9 ya shani hta mung Myen dap pawng hpawm hpung ni gaw Yup Tung jahpan hta ai ga baw hte Mare Lawk shagu ngu na daram hta shimlam la shamu shamawt hkawm nga ai hta dai aten hkawm sa ai masha ni hpe rim woi la ai lam ni galaw nga ai re nga nna ginra masha ni tsun nga ma ai.

Ya aten Jinghpaw mung kata gasat gala majan gaw matut manoi laja nga ai hta P.T.Ts hpung ni shamu shamawt hkawm nga ai ginra de mung gasat gala majan laja nga ai re. Danai ginra kata shamu shamawt nga ai Min Zin Tant P.T.Ts hpung ni mung Danai Lido lam mayan Wa Ra Zup, Jahtu Zup ginra kata hpyen n-gun madun hpyen shaman shakyang ai lam ni grai galaw wa ai hpe ginra masha ni tsun ai kaw na chye lu ai.

Danai ginra mayan shara la nga ai P.T.Ts hpung ni ya na zawn galaw wa ai masa hpe ginra mung masha ni tsun maram ai hta “Shawng daw de n dai zawn hpyen shaman shakyang galaw ai hpe nau n mu yu ai, Hpyen shaman shakyang shamu shamawt ai hta amyu shayi ni lawm wa ai hpe ma mu mada ai. P.T.Ts hpung ni shamu shamawt nga ai ginra de gasat gala majan nbyin ai shaning hku rai wa sai hte n dai masa hpe yu yang P.T.Ts ni hku nna Jau hkyen shajin ai masa mai byin ai,” nga nna ginra masha ni tsun maram nga ma ai re.

Danai ginra mayan hta gaw Min Zin Tant P.T.Ts hpung ni shara la shamu shamawt nga ai hte Jahtu Zup mare, San Pya mare, Jahtup mahkrai ni hkan shara 3 daram hta ngang ngang kang kang shara la da ai re lam chye lu ai.

Ginra masha ni tsun ai hta Jahtu zup mare shinggan hte P.T.Ts hpung ni shamu shamawt ai Wa Ra Zup mare du hkra shana shagu Drone hte hkan gawan yu ai lam ni dingyang galaw nga ai majaw hpyen masa grai shaja hkat wa na hpe Mung masha ni myit tsang nga ma ai lam chye lu ai.