Pajau Media Channel
23rd August, 2024
Lai wa sai July praw laman marang htu sawng ai majaw Myitkyina-Putao hkrun lam hten za mat ai shata mi jan na wa ai hpang n dai laman mawdaw kaji ni hkawm sa hpang nga sai raitim hten za mat ai hkrun lam hpe atsawm n lu gram sharai shi ai re majaw gunrai htaw mawdaw kaba ni n lu hkawm shi ai re nga nna mawdaw la ni tsun ai.
“Mani kaw nna mawdaw kaji ni gaw lung magang sai. Putao hkrun lam gaw htum hkra n mai hkawm shi ai. Sumprabum ndu shi ai Zanan Hka hte Nta Galu (deng 100-121) lapran kaw naw ra ai. Dai lam mayan lam gyi ru mat ai shara ni hpe ga gan kaput da ai kaw mawdaw ni n mai lai ai majaw Putao maga kaw na yu wa ai mawdaw ni bai tau la ai re. Du wa na bat lahkawng daram hta gaw mawdaw kaba ni mai hkawm sa mai na n hten. Mahkrai ni mung bai byeng nga ai, dai ngut yang gaw mai hkawm na sai,” nga nna tsun ai.
Myitkyina-Putao hkrun lam hpe lai wa sai March kaw nna Sumprabum ginra gasat gala majan a majaw hkrun lam pat kau ai shata masum daram na ai hpang June praw daram hta gan hpaw ya sai re. Ratim June shata htum hte July praw laman marang ladu lai htu sawng ai majaw hkrun lam ni gyi ru mat nna Putao ginra de mawdaw ni atsawm n lu hkawm ai gaw shata 6 daram na wa sai re.
Hkrun lam pat mat ai majaw Putao ginra gunrai ni nlu du mat ai re hte gunrai ni hpe nbungli hku mai byin ai daram htaw shalai la ai re hpe mung chye lu ai. Nbungli hku htaw shalai la ra ai re majaw gunrai manu ni ladu lai tsaw nga ai hte ginra masha ni grai yak hkak nga ai re hpe mung chye lu ai.
Comments