Pajau Media
13 Februray, 2025
Ndai laman Myitkyina-Putao hkawm taw ai mawdaw ni bu hkawm masha nlu na gumrai ni hte sha hkawm taw ai hpe mawdaw sara langai mi tsun ai kawn chye lu ai.
“Ya ndai laman gaw bu hkawm masha gaw nlu na lung yu taw ra ai. Bu hkawm masha lawm yang shagyit kaw grai tsun la ra ai. Sumpyi Yang shagyit kaw nga yang Myen hpyen dap ni nlai shangun na bai nhtang shangun ai ni jahkring hkring nga ai. Shanglawt ni na shagyit kaw mung ramma ni nga yang shahte woi mat ai ni nga ai. Dai majaw ya ndai laman asak naw ram ai bu hkawm masha ni hpe nhtaw na asak kaba sai ni sha hkawm sa ai,” nga nna Myitkyina-Putao hkawm taw ai mawdaw sara langai mi tsun ai.
February shata praw 8 ya shani Mali Hka lahta Weshi mare makau KIA hte Myen hpyen dap lahkawng maga gasat gala majan byin ai hpang Myitkyina-Putao lam dingyang lahkawng maga na shagyit ni hta san jep ai ni grau galaw wa nna hkrum lam hpe mung pat ai lam ni galaw ai hpe chye lu ai.
Dai shaloi kawn Myitkyina-Putao lam hku hkawm sa ai bu hkawm masha ni yawm wa nna kalang marang she asak kaba ai ni hkawm sa ai hte mawdaw lam dingyang lakawng maga na shagyit ni hkan jep ai lam ni grai sawng wa ai hpe chye lu ai.
Maga mi hta mung Myen hpyen dap ni kawn Putao muklum kata jep joi ai lam ni laja lana galaw nga ai re hte Myitkyina-Putao lam mayan nga Sumpyi Yang, Lung Sha Yang, Tang Ja mare ni hta hpyen n-gun jat da nhtawm hpyen shamu shamawt ai lam ni galaw nga ai hpe chye lu ai.
Shiga – Mali Hku
Comments