Myitkyina Muklum Lawk Langai Kaw Ndai Shata Praw Laman Damya Mya Ai Manghkang Masum Daram Byin Ai Lam

Pajau Media Channel

7th September, 2024

Jinghpaw mung Myitkyina Muklum Manhkring lawk kaw amyu shayi langai tsi rung kaw nna bai n htang wa ai lam kaw la marai masum kawn Nhkyi madi nna cycle gashun la kau ya ai lam Manhkring ginra masha tsun ai kaw na chye lu ai.

Mabyin gaw September 5 ya shana daw hkying masum jan aten daram hta tsi rung kaw na wa ai amyu shayi langai gaw Manhkring lawk kaw na mahkrai langai kaw la marai masum kawn Nhkyi madi jahkrit shama nna Cycle gashun la kau ai re lam Manhkring ginra masha langai mabyin hpe tsun dan ai re.

“Shi kasha gaw Machyi sawng na malap mat ai, bai dum wa ai shaloi tsi rung kaba de wa madun ai. Tsi rung lung ra ai majaw nta de wa na ra ai arai wa la ai aten manhkring lawk mahkrai langai kaw du ai shaloi damya mya hkrum na cycle la kau ya ai re, shi gaw lagaw lam bai wa ra mat ai,” nga nna Manhkring lawk kaw nna Mung masha langai tsun dan ai re.

Dai amyu shayi gaw dai cycle langai sha lu ai hpe damya mya hkrum ai majaw Cycle mung nlu mat sai. Ya aten kasha tsi rung lung na matu wa wa sa sa Cycle n lu mat let grai yak hkak nga ai re hpe mung chye lu ai. Manhkring lawk kaw ya na zawn damya mya, Cycle gashun ai manhgkang gaw n dai shata laman 3 lang daram byin lai wa sai raitim damya mya ai masha ni hpe rim zing ahkyak la ai lam n lu galaw shi ai re hpe mung chye lu ai.

Myitkyina Muklum kata ya aten Phone matut mahkai yawng dawm da hkrum ai re sha n-ga shiga hte seng nna hkum pat da hkrum ai aten mung re hte n dai laman Muklum kata lawk ni hkan lagut damya manghkang ni shani shagu byin nga ai raitim kadai mung n chye, n na kau ai sha lai mat ai mabyin ni mung law law nga ai re hpe mung chye lu ai.

Myitkyina Muklum hta uphkang masa hten mat ai 2021 hpang daw kaw nna ginra kata lagut damya manghkang ni, Nanghpam lu sha dut mari ai lam ni dam lada ai hku galaw wa ai hte lit nga ai Myen hpyen dap Asuya kawn lit la hparan ai lam n lu galaw ai re. N dai lam hte seng nna ginra kata lagut damya manghkang yawm wa hkra lit nga ai Asuya kawn ahkyak la ai lam galaw na hpe mung Mung masha ni ra sharawng nga ma ai re hpe mung chye lu ai.