Pajau Media Channel
12th August, 2024
Myitkyina Muklum kata August 11 ya shani shani hkying 11 Aten daram hta Mying n chye lu ai Lak lang hpung ni kawn sinat gap kapaw nna Mung masha ni hpe san jep jahkrit shama ai lam chye lu ai.
Shinggan Bu hpun palawng hpun da nna nta jawn Mawdaw hte Dap Kawng Htoi San Lawk kaw na Bar seng hku hpaw hkyen ai seng langai kaw kajawng kaja du shang wa nna seng kaw nga ai bungli masha marai shi daram hpe Hput di di shangun nna san jep ai lam ni galaw ai sha n-ga sinat Manga lang daram gap shadam jahkrit shama ai lam nga ai lam chye lu ai.
“Nta madu ni mung lawm ai, dai nta kaw bungli galaw na masha ni hte rai yang marai 10 daram hput di di da nna san jep ai lam galaw ai, dai shaloi marang mung grai htu ai, Shinggan bu hpun palawng hte Pala ninggang ni hpun da ai ” nga nna ginra masha langai tsun ai re.
Hpa majaw ya na zawn galaw wa ai hpe tup hkrak nchye lu ai re hte n dai zawn re ai mabyin lai wa sai 2023 shaning hta Dap kawng Lam kaba ntsa kaw nga ai Enrich Bar kaw mung shinggan bu hpun palawng hpun da ai lak nak lang hpung ni du shang wa nna san jep masha rim woi mat ai lam ni byin lai wa sai re hpe mung chye lu ai.
コメント