Myitkyina Muklum Kata Nga Taw Mat Ai Hpang Tara N Shang Nga Hkwi Sha Ai Lam Ni Law Wa Nga

Pajau Media Channel

30th August, 2024

Jinghpaw mungdaw de gunrai htaw mawdaw ni n shang mat ai hpang Myitkyina muklum kata Nga dut ai lam taw mat ai hpang tara n shang Nga gaba ai lam ni dam lada ai hku galaw wa ai re lam chye lu ai.

“Myitkyina muklum kaw Mali hka Nga, hka shi hkan na Nga ni hpe hkwi la na nta di hkan dut ai zawn re ai n nga mat ai daram rai sai. Raitim n dai laman Nga taw wa ai hpang kaw na moi na zawn Nga hkwi na n ta di hkan dut ai masha law wa ai, marai mali manga daram gaw jahpawt shagu hkan dut wa ai re,” nga nna Myo Thit Gyi lakying lawk kaw na mung masha langai tsun ai.

Dai sha n-ga Mali hka kaw Nga gaba jak hte hkan hkwi ai lam ni moi na zawn sha bai galaw nga sai re nga nna Myitkyina ginra masha langai mung tsun ai.

“Mali Hka ka-ang zunlawng dingyang hkan mung masha n kau Nga gaba jak hte hkwi nga ma ai, shawng daw de gaw Nga gaba ai lam hpe hkum pat, rim ahkyak la ai lam ni nga ai re. Nga Manu tsaw nga dingyang re majaw Nga gaba dut sha ai lam ni grai law wa ai,” nga nna mung tsun ai.

Ya aten Myitkyina muklum kata Nga joi mi kaw lap 50,000 lahta dut mari nga ma ai rai nna dai Nga ni hpe nbungli hku na htaw shalai la ai re, raitim gat hkan Nga dut ai masha pyi n nga sai re hpe mung chye lu ai. Ginra masha ni tsun ai hta nbungli hku htaw shalai la ai Nga ni hpe manu hpu ai hku mari sha ra ai majaw nchyang bungli galaw let kan bau ai mung masha ni a matu gaw grai yak hkak ai madang byin nga sai re.

Gunrai dut hpaga galaw ai hpaga masha ni pawng nna n bungli langai hpe lak san shap la nna Nga hte kaga gunrai malu masha ni hpe Mandalay kaw na Myitkyina Muklum de htaw shalai na matu hkyen lajang nga ai re hpe mung chye lu ai.