Myitkyina Muklum Kata Na Manam Jarawp Nkau Hta Myen Hpyen Dap Kawn Shang Jep Ai Lam Ni Galaw Nga

Pajau Media

4 February 2025

Jinghpaw mung daw Myitkyina muklum kata na manam jarawp nkau mi hta myen hpyen dap kawn January praw hkan kaw nna kajawng kaja shang jep ai lam ni galaw nga ai hpe chye lu ai.

“Praw 1 ya shana hkying 10:30 laman hta chyinghka sa akawt na hpaw dat ya ai. Dai kaw sinat lang da ai balik hte hpyenla ni shang wa na Phone ni hpe la na jep ai, ngut yang yupra hkan ma tam ai, hpa shiga lu na kun gaw nchye ai, laga laksan san ai ni gaw nnga ai,” nga nna Yuzana lawk kaw nga ai manan jarawt langai hta manam nga ai slg langai shi hkrum katut ai mabyin hpe tsun dan ai re.

Mare municipal rung makau kaw nga ai mung masha langai mi gaw, “Ngai gaw ntsa htap kaw Phone shaga taw ai, dai shaloi nta shawng na manam jarawp kaw balik ni hte hpyen la ni grai shamu shamawt taw na hpyen lahkawn ai kun, hpa kun ngu shadu taw ai rai nga. Aten gaw shana hkying 11 ram rai taw sai. De hpang she manam jarawp shang jep ai hpe chye ai, grai kajawng kau sai,” nga nna shi hkrum katut ai mabyin hpe tsun dan ai re.

Lai wa sai shata hkan hta mung Myen hpyen dap kawn Myitkyina muklum kaw nga ai manam jarawp hkan hta shang yu ai lam ni nga tim ya na zawn shang jep ai ni n-galaw ai sha majoi san jep ai hte sumla ni gayet la ai lam ni sha galaw ai hpe chye lu ai.

Shiga-Dewa