Pajau media
22.3.2025
Jinghpaw mung kata 2011 ning majan bai hpang wa ai kaw na koi yen nga ai Myitkyina muklum kata na hpyen yen dabang ni hpe dawm hpang wa ai hta march 22 ya shani hta gaw Shatapru camp hpe dawm na matu akyu hpyi ai lam chye lu ai.
2011 majan hpang koi yen kau da ai Myitkyina-Manmaw lam mayan gaw ya aten Shanglawt Uphkang ginra re wa sai majaw hpyen koi yen Mung masha ni mung tinang buga de jasan jaseng let nga magang wa sai masing kata ya na zawn galaw wa ai re hpe chye lu ai.
Ya dawm magang sai hpyen dabang kaw shanu nga ai Mung masha n kau gaw wa magang ai ni lawm ai hte law malawng gaw Gara Yang, Dabak, Japu mare kahtawng hkan na re lam chye lu ai.
Buga de wa nga na matu n jin shi ai ni gaw camp hpe gaw dawm kau sai re majaw makau mayan hkan n ta shap rawng nna she buga de wa na matu shajin ra ai masa re nga nna hpyen koi yen Mung masha ni tsun ai kaw na chye lu ai.
Shatapru camp hta camp kata kaw nga ai ni hte camp kaw jahpan bang da nna shinggan hkan nga ai ni hte rai yang htinggaw 80 grup yin shanu nga ai camp re hpe mung chye lu ai.
Hpyen yen Mung masha ni tsun ai hta Myitkyina muklum kata na hpyen yen camp ni hpe gau ngwi ngwi dawm sa wa na re lam, ya aten hpyen yen mung masha ni mung muklum kata majan ni sawng wa na hpe myit tsang ai majaw buga de wa na matu arai lahka htawk magang ai ni law wa sai re hpe mung chye lu ai.
Shiga-Pyilan U
Comments