Myitkyina Muklum Kata Myen Hpyen Dap Kawn Shimlam Shaja Nga Na Muklum Kata Na Seng Ni Hpe Mying Hkan Hta Ai Lam Galaw Nga

Pajau Media

27th February 2025

Myitkyina muklum lambraw hte lam kaba hkan Myen hpyen dap ni kawn lai wa lai sa masha ni hpe san jep ai hte ginra masha ni a seng mying ni hkan hta ai lam chye lu ai.

Lai wa sai February 22 ya shani hta mung Shatapru dakkasu jawng lam kaba makau na seng ni hpe Myen hpyen dap a masha ngu maram lu ai masha marai 10 ram gaw seng langai hte langai na mying ni hkan hta ai lam chye lu ai.

Ya ndai laman Myitkyina muklum hta Cycle bawchyawp nchyawp na gau ai ni hpe rim jep nna Cycle langai hta gumhpraw Lap Mun Lahkawng hta sha nga ai lam mung chye lu ai.

Maga mi hta mung Myen hpyen dap ni kawn Namati ginra Namati mare lambraw hte Chyauk Tawng shagyit (ကျောက်တောင်) hkan Cycle, Mawdaw ni hte lai ai mung masha ni hpe san jep ai lam ndai laman grai galaw nga ai lam tsun ai.

Ya ten Namati hta Myen hpyen dap hte P.T.Ts ni pawng nna mare kata shimlam jat ai hte hpyen shamu shamawt ai lam ni galaw nga ai lam ginra masha ni tsun ai kawn chye lu ai.

Shiga - Htu Seng