Pajau Media
23.9.2024
Jinghpaw Mung Myitkyina M.P.Hk kaw Myen hpyen dap kawn mare uphkang salang ni hpe shaga la nna hpyen hpaji sharin ya nga ai lam ginra masha ni tsun ai kaw na chye lu ai.
Ginra masha ni tsun ai hta Myen hpyen dap gaw mare shim lam gabaw hte Uphkang salang ni hpe shaga la nna hpyen hpaji sharin ya ai lam tsun ai re. Myen hpyen dap gaw n dai laman hta KTV zawn re ai ramma ni law malawng sa ai pyaw chyai ginra hkan hpyen lahkawn ai lam ni galaw ai sha n-ga Muklum shinggan jep joi shagyit hkan gumhpraw hta, jep joi ai lam ni grai galaw wa ai re lam chye lu ai.
Lai wa sai September 11 ya kaw nna Myitkyina Muklum kata Myen hpyen dap shara la shamu shamawt ai lam grai galaw wa ai hte Muklum kata shana daw hkying 7:00 -8:00 pm grup yin hkan Drone hte kyin yu yu hkawm ai lam ni galaw ai lam, lak nak kaba hkrup mara gap shadam ai lam ni mung galaw nga ai re hpe chye lu ai.
September 11 ya kaw nna Nawng Nang Deng 10 mare kata de mung n-gun 30 daram nga ai hpyen hpung ni wa shang shara la nga ai hte Myitkyina Tang Hpare hkawm sa lam maw kaw mung lai wa lai sa ni hpe hkap jahkring nna cycle langai mi kaw lap 10,000 hta nna jep joi ai lam galaw ai re hpe mung chye lu ai.
Myen hpyen dap gaw ya aten Jinghpaw Mung kata de hpyen n-gun jat shamu shamawt ai lam grau galaw wa ai hte Myitkyina Muklum kata Palana, Nam Jim, Shwe Zet, Manhkring hte Mali Zup Tang Hpare maga de mung hpyen n-gun jat ai lam galaw nga dingyang re hpe mung chye lu ai.
Comentarios