Pajau Media
16.1.2025
Jingpaw mung Myitkyina Muklum kata shani chying tung nhkyi madi nna Cycle gashun manghkang ni grai law wa ai majaw hkawm sa hkawm wa grai sadi maja let hkawm sa ra ai nga nna ginra masha ni tsun ai re.
Damya ni gaw lai wa lai sa masa hpe yu nna hkawm sa hkawm wa masha ni hpe hkan shachyut nna nhkyi madi nhtawm cycle gashun ai lam ni galaw nga ai lam Mile 8 kaw nna Cycle gashun la hkrum ai amyu shayi langai tsun ai re.
“Mile 8 kaw nna myo de lak jat (သင်တန်း) sa lung ai kaw na wa ai rai nga, tsun ga nga yang lam kadun ai Manhkring lawk hku wa ai rai nga. Dai lam gaw masha nau n lai ai re. Shani re majaw lai ai re wa La marai masum gaw ngai hpe n mai hkawm hkra shingdang ai majaw ngai gaw Cycle galau mat ai. Dai shaloi nhkyi madi na Cycle gashun la mat ai, Phone ma lawm mat ai. Marawn na mung hkrit ai majaw hpa n gwi marawn ai. Makau na myit su salang langai she nta de bai wa sa ya ai,” nga nna tsun ai re.
Myitkyina Muklum hta Internet Line dawm mat ai hpang kaw nna Internet seng ni law wa ai hte shana daw ning rim rim wa ai aten Internet sa lang na matu sa wa ai lam kaw Cycle gashun katut ai manghkang ni law wa ai masa hpe mung ya na zawn tsun ai re.
“Ya gaw grai hkrit ra sai. Shana ningrim rim ai hte gaw n mai hkawm sai lu. Dai internet sa lang ai nga na Cycle gashun Phone kashun katut ai ni grai law wa ai. USA Lum Tu Lam braw hku yu wa ai dai lam ma Cycle gashun manghkang jahkring hkring byin ai. Shawng na bat hta mung dai lam kaw sha internet lang na wa ai num kasha lahkawng hpe nhkyi madi nna Cycle gashun la mat ai,” nga nna tsun ai re.
Myen mungdan hta Mung masa a majaw matut mahkai yak, galaw lu galaw sha bungli taw ai hte shang gumhpraw gaw n nga ai masa hta Muklum kata lagut damya manghkang ni grau grau law wa ai re. Muklum kata byin nga ai masa lam hpe Uphkang nga ai lit nga ai ni kawn mung ahkyak la lu ai lam n nga ai re.
N dai masa kaw tinang hkum shimlum lam hpe tinang nan lit la ra ai re majaw masha lai wa lai sa nau n nga ai lam hkan shani raitim langai hkrai hkawm sa ai lam n galaw yang kaja ai hte ra ai hta hkan na hkawm sa yang grai sadi maja nna she hkawm sa ga nga nna ginra myit su salang ni tsun sadi jaw da ai re.
Shiga – Pyilan U
Comentários