Pajau Media
23.10.2024
Gasat gala majan matut manoi byin nga ai Jinghpaw mung kata n dai laman Jak Sau manu ni bai tsaw lung wa ai re lam ginra masha ni tsun ai kaw na chye lu ai.
Majan a majaw Myitkyina-Mandalay hkrun lam hku Jak Sau mawdaw ni tsep kawp n shalai mat ai gaw lai wa sai August shata daram kaw nna rai sai re hte Jak Sau ni hpe Kanpaiti lam hku na sha madung htaw shalai la nga ai re. Raitim Miwa mung jarit mayan Kanpaiti maga de ya aten hpyen masa grai shaja hkat nga ai hte Jak Sau mawdaw shalai ai lam hkring mat ai majaw Myitkyina kaw Jak Sau manu ni grai bai rawt wa ai masa re nga nna ginra masha langai tsun ai re.
“October praw daram du hkra gaw Jak Sau manu grai rawt hkra gaw nre, 1 liter kaw 6,500 hte 7,000 lapran nga ai re, dai hpawt bai wa bang yu yang 8,800 hte 9,000 lapran du taw sai, gunrai manu mung yawm ai lam n nga ai kaw tam lu tam sah gaw yak re, grai nga yak wa ai masa she rai sai,” nga nna Mung masha langai tsun ai re.
Jinghpaw Mung de shang ai Jak Sau ni hpe Miwa jarit Kanpaiti hku na sha shalai la ai raitim October 15 ya daram kawn Kanpaiti grup yin hpyen masa grai shaja hkat wa ai majaw hkawm sa hkawm wa hte Jak Sau mawdaw ni shalai ai lam ni pat kau ai re hpe mung chye lu ai. Ya aten Kanpaiti Muklum kaw gasat gala majan grai laja nga dingyang re lam mung chye lu ai.
Jinghpaw Mung kata Jak Sau sha n-ga kaga gunrai manu ni mung tsaw nga dingyang re hte Myitkyina-Mandalay hkrun lam hku ya aten hkrun lam hkawm mawdaw ni, gunrai htaw mawdaw ni hkawm ai lam gaw nga ai raitim hkrun lam lapran yawm htum n htoi 8 ya kawn 13 ya daram du hkra na ai majaw gunrai manu tsaw ai sha n-ga taw ai madang byin nga ai re hpe mung chye lu ai.
Comments