Pajau Media Channel
16th August, 2024
Myitkyina muklum kata n dai laman jak sau manu ni grai bai tsaw lung wa ai re lam ginra masha ni tsun ai kawn chye lu ai.
Jinghpaw mung ginra de shang ai jak sau ni gaw Jinghpaw mung Sagaing jarit mayan hte Waingmaw-Kanpaiti lam hku madung shang ai rai nna jak sau mawdaw ni Jinghpaw mung de lung wa ai gaw nga ai raitim Jinghpaw mung Sagaing jarit mayan Namsi Awng jepjoi shara kaw n shalai ai re hpe mung chye lu ai.
N dai masa hpe ginra masha ni tsun maram da ai hta “Namsi Awng gate kaw sau mawdaw ni grai jahkring da ai, sau madaw ni jahkring da ai gaw Namsi Awng gate hpe htim gasat hkrum na tsang ai majaw nshalai ai masa re sam ai,” nga nna ginra masha ni tsun maram nga ma ai re.
Ya aten jak sau pump seng ni hkan 1 liter hta lap (6,500) kaw na (6,850) du hkra tsaw nga ai re hte shinggan lam makau seng hkan gaw lap (7,100) kawn (7,500) du hkra tsaw lung nga ai re hte Myitkyina muklum kata sau pump seng kaba n kau ni mung pat da ai re hpe mung chye lu ai.
N dai laman jak sau mawdaw ni gaw Waingmaw-Kanpaiti hku shang ai re. Jak sau mawdaw ni dingyang shang ai raitim Myitkyina ginra hta jak sau ni manu tsaw nga ai gaw maga mi de Miwa gumhpraw manu lung ai majaw mung re lam chye lu ai. Miwa gumhpraw Yuan 100 kaw Myen mung gumhpraw mun matsat jan du hkra tsaw lung nga ai re hpe mung chye lu ai.
Myitkyina muklum hta jak sau sha n-ga gunrai manu ni mung grai rawt nga ai rai nna mung masa a majaw hkawm sa hkawm wa matut mahkai lam ni mung naw yak nga ai hte mung masha ni lam shagu grai ginchyum chyat yak hkak wa nga ai re hpe mung chye lu ai.
Comments