Pajau Media Channel
June 18, 2024
Myitkyina muklum hta dai ni June Shata nhtoi 18 ya shani ka-ang kaw nna, lak nak kaba nsen jahkring hkring na lu taw ai majaw mung masha ni hkrit tsang nga ai lam, ginra masha ni tsun ai.
Lak nak kaba nsen gaw shani ka-ang hkying 12 hpang daw kawn na lu ai rai nna, shana daw hkying 2 hpang daw hta gaw minute 10 hta kalang na lu taw ai re hpe mung chye lu ai.
“nsen gaw hpang daw de she grau ngoi nna grau ni wa ai zawn nga ai. Gara maga na gap ai gaw nchye tsun ai raitim mung, nsen gaw grai ngoi ai. Asak kaba sai dinggai dingla ni, ma kaji ni hte salum ana lu ai ni gaw kajawng ti pi salum kahprap byin chye ai,” nga nna Myitkyina ginra masha langai tsun dan ai.
Lak nak nsen gaw 9 lam daram ngoi kadu ai rai nna, minutes 10 hta kalang ngoi ai re nga nn mung, matut tsun dan wa ai re.
“shani ka-ang kawn na taw sai. Shawng kalang na nsen pi grai ngoi ai re. Hpang daw de nga jang grau ngoi wa ai. Nta makau kaw sa gap ya taw zawn she nga ai re. Nta pi gara ai le.” Nga nna lahta na salang wa matut tsun dan ai.
Lak nak kaba nsen a majaw hkra machyi ai lam, hkrat kapaw ai lam hte hpa majaw gap ai lam ni hpe pajau media kaw nna matut sagawn nga ding yang re.
Myitkyina muklum hta KIA pawng hpawm hpyen hpung ni a shagrawt majan hpang ai March shata kaw nna, dai ni du hkra lak nak kaba nsen hpe jahkring hkring na lu nga ai re lam, ginra masha ni tsun dan ai kaw na chye lu ai.
Comments