Myitkyina Muklum Hta Lak Nak Kaba Nsen Ni Shani Shana Ngoi Garu Nga Ai Rai Nna Bala Min Htin Mahkrai Hta Jep Joi Ai Lam Ni Grau Galaw Wa

Pajau Media

April 28.2025

N dai laman Myitkyina muklum hta mung Myen hpyen dap kawn gap ai lak nak kaba nsen ni shani shana na wa ai sha n-ga Myitkyina-Waimaw matut da ai Bala Min Htin mahkrai kaba hta mung lai wa lai sa ni hpe jep joi ai lam grau galaw wa ai lam ginra masha ni tsun ai.

“Bala Min Htin mahkrai kaw gaw dingyang jep ai gaw re, raitim ndai laman lam kaw tsap taw ai hpyen la hte balik ni mung grau law wa ai. Lai wa lai sa mawdaw ni hpe arung arai kaw na hkawt azing ayang jep joi nga ai. Kalang lang mahkrai kaw mawdaw cycle nau chyat na lai na matu pyi yak ai,” nga nna lai wa lai sa Mung masha langai tsun ai re.

Law malawng gaw mawdaw ni hpe madung jep ai raitim cycle jawn ai ni hpe mung yu nna n tsen n hten ai masha ni hpe hkap jahkring la nna Phone ni hpe ahkrawk jep ai re. Law malawng rim hkrum ai ni mung Bala Min Htin mahkrai kaw re majaw lai wa lai sa Mung masha ni hku nna mung tinang shimlum lam a matu phone ni hpe dingyang jep joi jasan jaseng kau nna she hkawm sa ra ai. Phone jep hkrum ai majaw shawngna bat hta ramma langai mung rim hkrum ai lam matut tsun da ai re.

“N dai laman grau jep wa ai ngu mai tsun ai. Shawng na bat hta mung Sadung maga de na yu wa ai ramma langai hpe mahkrai kaw hkap jahkring la nna Phone jep ai kaw KIA hkying hte re ai sumla kaw shi lawm taw ai majaw rim woi mat ai. Dai ramma gaw moi Maina hpyen yen camp kaw nga lai wa ai re. Rim hkrum ai shani kaw nna ya du hkra hpa shiga mung n na mat, n lu sagawn mat sai,” nga nna tsun dan ai re.

Ya aten Myen hpyen dap gaw gap hkat jahkring ai lam ndau da ai raitim April 20 jan ya kaw nna Jinghpaw mung kata Hpyen n-gun kaba hte htu lung wa nna Manmaw ginra, Hpakant lam Ka Mai ginra hkan hpyen masa grai shaja hkat nga ai aten mung re.

N dai laman Myitkyina muklum kata kaw mung shani shana lak nak kaba n sen ni matut manoi ngoi nga ai re sha n-ga muklum kata lak nak kaba si wa hkrat nna Mung masha asak si sum ai madang byin nga ai re hpe mung chye lu ai. Myen hpyen dap gaw ya aten Myitkyina muklum kata na hpaji jawng ni hkan du hkra shara jahkrat wa sai nga nna Myitkyina ginra masha ni tsun dan ai re.

Shiga-Pyilan U