Pajau Media
25 February 2025
Myitkyina-Mandalay lam hta Myen hpyen dap hte KIA ni kawn ramma ni hpe hpyen laja lana lahkawn ai lam galaw nga ai hpe chye lu ai.
Dai lam ntsa hta ramma ni hpe hpyen lahkawn nga ai gaw lai wa sai January shata shawng na bat kaw na rai nna ndai laman gaw shawoi na hta grau lahkawn taw nga ai nga nna tsun ai re.
“Ma gaw Mandalay de sanpoi htai na matu sa ai. Nbungli manu laja ti mawdaw hku sa ai ten hpyen lahkawn hkrum ai re. Mawdaw la ni kaw na sagawn yu yang mung atsawm nchye lu ai. Shanhte hpe mung hpyen lahkawn ai ten lahput hput di da shangun na lata sharawt baw gum da shangun ai da,” nga nna hpyen lahkawn hkrum ai ramma ma langai na nta masha ni tsun ai re.
Hpyen lahkawn hkrum ai shaloi Phone line hte internet line nnga ai a majaw lahkawn hkrum ai masha ni hpe gara shara de woi mat ai hpe gaw nchye lu ai nga nna tsun ai re.
Ndai laman hta mung Myen hpyen dap ni kawn Myitkyina-Mandalay lam ntsa hpyen n-gun htu shadut shamu shamawt ai hpe mu nna aten ntam lam pat ai ni galaw ai hpe madaw sara ni tsun dan ai kawn chye lu ai.
Mohnyin muklum na mare ni rai nga ai Hopin, Bilu muklum, Tae Gyi Kone mare, Pinhe mare, Pyinthar mare ni hta January shata kawn hpang nna Sam Hkyeng P.T.Ts ni kawn ramma ni hpe hpyen lahkawn nga ai ten KIA maga mung Sagaing hte matut da ai Namsi Awng mare, Mogaung muklum kata na Pin Kyaing mare, Samaw mare, Mai Naung, Loi Mun mare maga de hpyen lahkawn taw nga ai hpe mare masha ni kawn tsun ai re.
Shiga – Kachin Pyi Tar
Comments