Pajau Media Channel
19th August, 2024
Jinghpaw Mung Myitkyina Muklum Mali hka ka-ang na Zunlawng kaw August praw kaw nna Ja htu sha ai masha grai law wa ai re nga nna ginra masha ni tsun ai.
Myitkyina Muklum kata hka kaba tsinyam hkrum lai wa ai hpang kaw nna Mali hka mayan ja htu sha ai lam law wa ai hta Myen hpyen dap kawn Hkum pat rim ai lam ni galaw ai majaw Ja Htu ai masha n nga ai madang rai mat ai re, raitimung ya hte numdaw lahkawng lang ngu na hta Ja htu ai magam bungli galaw ai hta masha grai bai law wa ai re nga nna ginra masha ni tsun nga ma ai.
Ya aten ja manu ni grai tsaw nga ai re hte ja Ywi mi kaw Mun masum jan du hkra lung nga ai re hte lani mi lu sha a matu law ai majaw ya aten galaw lu galaw sha yak hkak nga ai aten Ja htu sha ai magam bungli galaw ai masha grai law wa ai re hpe mung chye lu ai. Mali Hka Ka-ang Zunlawng kaw shani shagu ja htu ai masha marai (60) daram du hkra nga ai nga ai rai nna Hka Chyup Jak kaji ni hte htu nga ma ai re hpe mung chye lu ai.
Myen hpyen dap mungdan ahkaw ahkang zing madu ai 2021 hpang daw kaw nna Jak kaba ni hte htu sha ai lam grai law wa ai rai nna Mali hka Mazup mayan jak kaba ni hte Ja htu ai lam grai law wa ai majaw Hka Lam ni yawng gashai mat nna Hka Kaba ai mayak ni hkrum katut nga wa magang sai re hpe mung chye lu ai.
Comentarios