Pajau Media
27.1.2025
Myen hpyen dap P.T.Ts pawng hpawm hpyen hpung ni gaw Myitkyina Mai 8 Yinghkaw lam braw kaw shara la nna lai wa lai sa Mawdaw ni hpe atsin ayang jep joi gumhpraw hta ai lam Ginra masha ni Tsun ai.
Dai hpyen hpung ni gaw Mai 8 ginra kata shara htawt nna shamu shamawt hkawm nga ai re hte Yinghkaw Lam Braw wa dung ai masum mali ya daram rai wa sai rai nna lai wa lai sa mawdaw ni hpe jep joi ai lam ginra Mai 8 kaw na masha langai Ya na zawn tsun ai.
"Hpyen hkying ma hpun da na sinat hte hkrak re ai Hpyen la marai 5 daram re, dai Yinghkaw lam braw kaw dung ai mali ya daram re wa sai, arai grai law hkra htaw ai Mawdaw ni, hkawm sa hkawm wa mawdaw ni hpe yu nna jahkring la ai, mawdaw chyinghka hpaw ahkrawk jep ai, Mai 8 grup yin kaw sha shara mi kaw htawt htawt re na nga ma ai, madung gaw Gumhpraw hta sha ai ga rai nga " nga nna tsun ai.
Myen hpyen dap pawng hpawm hpung ni gaw Muklum kaba makau mayan hkan shamu shamawt lam grau galaw wa hta myit lu yang lu ai hku lai wa lai sa ni hpe Phone ahkrawk jep ai lam ni galaw ai majaw tinang a Phone shimlum hpe tinang lit la na galaw ra ai nga nna ginra masha ni tsun ai re.
Myitkyina Mai 10 lahta Lamung Zup kaw mung Myen Hpyen Dap shara jahkrat nga ai shata (5) daram rai wa sai hte lai wa lai sa ni hpe gumhpraw hta ai sha n-ga Mung masa hta hkan lai wa lai sa ni hpe laja lana jep ai lam ni galaw nga ai re hpe mung chye lu ai.
Ya aten Manmaw de mung majan grai laja nga ai hta Myen hpyen dap kawn ya na zawn Mung masha ni hte ni ai Muklum hkan shala shani wa ai masa hta Mung masha ni shimlum lam a matu grai myit tsang ai lam Myitkyina ginra masha ni tsun ai kaw na chye lu ai.
Shiga – Pyilan U
Commenti