Pajau Media
27.11.2024
Myitkyina-Danai Lido lam ntsa nga ai Myen hpyen dap hte shi npu kaw nna P.T.Ts hpung ni gaw lai wa lai sa hkrun lam hkawm mawdaw ni hpe gumhpraw ladu lai hta sha nga ai lam Myitkyina-Danai lapran mawdaw gau sha nga ai mawdaw la ni tsun ai.
Hkrun lam hkawm masha htaw mawdaw ni hpe gaw lap 70,000 hta nna Jak Sau hte gunrai htaw mawdaw ni hpe gaw htaw ai gunrai masa hta hkan nna sen 10 kaw nna Sen 50 lapran hta nga ai re lam tsun ai re.
Danai Lido lam ntsa nga ai Myen hpyen dap hte P.T.Ts pawng hpawm hpung ni a jep joi shagyit ni yawng rai yang 7 nga ai rai nna shagyit shagu kaw hkrun lam hkawm masha ni, gunrai htaw mawdaw ni hpe hkap jahkring nna gumhpraw hta nga ai re lam chye lu ai.
N dai masa a majaw Myitkyina-Danai hkrun lam lapran hkawm sa hkawm wa lam hta Sen 50 grup yin ma ai re majaw mawdaw gau bungli galaw sha ai ni hte hkawm sa hkawm wa Mung masha ni grai yak hkak nga ai lam chye lu ai.
Myitkyina kaw na Deng 100 grup yin tsan ai Danai Lido lam gaw marang ladu lai htu sawng ai majaw hkrun lam yak hkak ai hta Na Htu Jak, Ga Ganaw Mawdaw hte Ma Gwi ni hte yak yak hkak hkak rai hkawm sa ra ai sha n-ga ya aten Jak Sau hte gunrai taw ai mayak a majaw Mawdaw gau bung li galaw nga ai ni n kau bungli hkring da ra ai madang byin nga ai re hpe mung chye lu ai.
Comentários