Pajau Media
14.10.2024
Jinghpaw Mung kata Internet line dawm kau ai hpang Mungdan pru shang ahkang laika buk galaw ai lam ni mung hkring mat ai re hte October 14 ya kaw nna gaw Myitkyina kaw bai mai galaw sai nga nna October 11 ya shani seng ang ai ni kawn n dau da ai lam nga ai re hpe mung chye lu ai.
Ndau laika hta “Mungdan pru hkawm ahkang laika buk hpe Online appointment date lu da sai ni hpe Yangon, Mandalay rung ni hta galaw ya ai kaw na October 14 ya kaw nna Myitkyina rung kaw mung bai galaw sa wa na re lam, shawoi na zawn dinghku jahpan hte Mungchying masat ni hkum hkum zup zup hte Myitkyina kaw mung bai mai galaw sai re,” nga nna tsun n dau da ai re hpe mung chye lu ai.
Jinghpaw Mung kata lai wa sai July 21 ya kaw nna Phone hte Internet line ni yawng dan di kau ai hpang Mungdan pru shang laika buk galaw ya ai lam ni hpe jahkring kau ra ai re hpe mung chye lu ai. Mungdan pru shang laika buk galaw mayu ai Jinghpaw Mung na Mung masha ni ram ram yak hkak mat ai hte hkyak hkyak ra ai ni yawng gaw Yangon, Mandalay de yu nna wa galaw la ra ai re hpe mung chye lu ai.
Myen hpyen dap gaw mungdan pru shang laika buk hpe Online Booking ladat hte QR code la nna n htoi jau tau la da ai ladat hku galaw ya nga ai gaw 2022 March 21 ya kaw nna galaw hpang wa ai re hte December 5 ya hta bai jahkring kau ai re. Dai hpang 2023 Febuary 24 ya kaw nna Online hku nna booking la ai ladat hpe bai galaw na matu masing jahkrat galaw nga ai hta 2024 May 1 ya kaw nna bai hkrang shapraw galaw hpang wa ai re hpe mung chye lu ai.
Photo credit
Comments