Pajau Media
7.10.2024
Myitkyina ginra kata gunrai manu rawt nna tam lu tam sha yak ai lapran lagut damya manghkang ni mung shani shagu ngu na daram byin law nga ai hta n dai October praw bat laman Hti Win Chyarapati lawk kata Cycle, Phone gashun manghkang ni grai byin ai lam ginra masha ni tsun ai.
Shana de ningrim Rim wa ai ten hkan tinang hkrai hkawm sa ai lam sadi ra na hte lai wa sai bat laman Hti Win (ကြေးလက်ကမ္ဘာ) lam maga de byin wa ai mabyin hpe mare masha langai tsun ai hta “Lai wa sai bat laman sha byin ai re. Nye hkau gaw Myo de bungli galaw na wa ai lam kaw la marai masum daram hkap jahkring na anhte Shanglawt hpyen la ni re nga na hpyen lahkawn hkyen ai zawn rai na nye hkau hpe sumri hte gyit da na kalang ta cycle jawn hprawng mat ai. Cycle kaw Phone ma lawm mat ai,” nga nna Cycle gashun hkrum ai wa a manang langai mabyin hpe tsun dan ai re.
Myen mungdan Uphkang masa hten za ai hte Mungdan asuya kawn mung nlu gawn hkang mat ai hta byin nga ai manghkang ni hpe lit la ai lam n nga sai re. Shani hkan mung nta sin ai masha nan nga ra ai, n ta makau hkan mung Cycle mat ai lam jahkring hkring byin ai re nga nna Hpung magam gun sara langai mung tsun ai re.
“Ya gaw tinang hkum tinang makawp ra sai. Mungdan uphkang ai asuya mung hten sai re majaw kadai hpe n mai kam sai. Ahhte nga ai Hti Win Chyarapati ginra hkan Da ginsup dabang ni mung nga na grau lagu lagut manghkang grai law ai. Mana mung n ta makau kaw 125 Cycle langai lagu la mat ai,” nga nna tsun dan ai re.
Lagut Damya law manghkang law wa ai masa hta Hti Win, Chyarapati ginra lam makau hkan gat seng hpaw nna shang gumhpraw tam nga ai ginra masha ni mung seng pyi n gwi hpaw wa sai re. Damya mya hkrum na tsang ai majaw pat kau na lam tsun garu ai n-sen ni grai na wa sai lam mung chye lu ai.
Tam lu tam sha yak nga ai aten tinang dang di dang dep ai hku seng kasha hpaw let shang gumhpraw tam nga ai re majaw seng pat kau yang mung shang gumhpraw pat mat na re majaw hkrit tsang let galaw sha ra ai masa re lam mung chye lu ai.
Lai wa sai September praw bat hta mung Chyarapati lawk masha lai wa lai sa nau n nga ai shara kaw Num sha langai hpe n hkyi hte galun sat kabai da ai mabyin byin lai wa sai re sha n-ga dai maga de damya manghkang jahkring hkring byin ai lam ginra masha ni tsun ai.
Comments