Pajau Media
19 November, 2024
Myitkyina-Mohnyin hkawm sa hkrun lam lapran hta Myen hpyen dap n pu masha ni a gumhpraw hta sha shara shagyit grai law wa ai majaw hkrun lam hkawm masha ni hte mawdaw gau sha ai mawdaw la ni yak hkak ai lam tsun dan ai kawn na chye lu ai.
“Myitkyina kaw na mawdaw hkawm ai hte nan shagyit re sai. Myitkyina-Mohnyin hkrun lam lapran shagyit 22 ting nga ai. Shagyit shagu kaw nan hta ai. Sau manu gaw hpu ai hte mawdaw hten yang bai byeng ra yang grau sawng ai. Mung masa gaw bai n pyaw ai hte galaw lu galaw sha grai yak wa sai,” nga nna Myitkyina-Mohnyin lapran mawdaw gau sha ai mawdaw la tsun da ai re.
Shagyit kaw gumhpraw hta nga ai ni gaw Myen hpyen dap n pu na lak nak lang hpung ni re hte hkrun lam hkawm masha ni hpe san jep ai hta mung shagyeng nna tsun shaga ai re nga nna hkrun lam hkawm masha langai tsun ai re.
“Ngai mung Myitkyina-Mohnyin kaw na amyu nga ai majaw jahkring wa chyai ai re wa Mogawng shang wa ai kaw mung chying masat jep ai. Ga shaga mung grai zai, grau nna amyu shayi ni hpe hpa n nawn ai hku tsun shaga ai, n seng ai ni mung grai san ai, ya nga yang Myitkyina-Mohnyin lapran Mun Kru daram jaw ra ai kalang sa na matu mawdaw manu hte grai n loi ai,” nga nna amyu shayi langai tsun ai re.
Gunrai htaw mawdaw hte sau htaw madaw langai hta lap 30,000 kaw na 50,000 du hkra hta ai sha n-ga muklum numshang kaw Leng manu nga di lap 5,000 naw hta ai majaw ya aten na masa hta bungli galaw sha grai yak hkak ai lam ginra masha ni tsun ai re.
Shiga - Kachin Pyi Tar
Comments