Pajau Media
18.12.2024
Jinghpaw Mung kata Internet Phone line dawm kau ai hpang Muklum kata Starlink wifi jak ni jai lang law wa ai re hte online ntsa hku jak dut shabra ai lam hpe sagawn rim ai lam ni galaw nga ai re lam chye lu ai.
Myitkyina Muklum kata hta Internet n lu mat ai hpang Starlink jak ni hte Online lu hkra jai lang nna seng hpaw sha ai ni mung lani hte lani law jat wa ai hte maren jak dut sha ai ni mung law wa ai re. Ndai masa lam hpe Online hku nna jak dut shabra htaw shalai ai lam hpe Myen hpyen dap kawn sagawn rim ai lam re nga nna ginra masha langai tsun ai re.
“Ngai na manang ni gaw Online ntsa kaw nna gat dut sha ai ni rai nga, line n lu ai hpang Starlink jak ni mung Online ntsa dut sha ai lam law wa ai majaw dai bai galaw ma ai, Online kaw dut ai re nga yang gaw htet mari ma ai, htet ai ni wa Balik ni re di kalang ta wa sa ai kaw rim la kau ai, masha hpe n rim mat na tsamai ai, ya gaw jak hpe rim la kau ai lam ni law nga ai, Online ntsa kaw mu ai hte hkan sagawn sai,” nga nna tsun ai re.
Internet seng ni nnan sha hpaw wa ai aten hta jak hte hpawn masha rim nna masha hpe pyi gumhpraw hte bai shaw la ra ai madang re. Jinghpaw mung kata majan lani hte lani sawng wa ai majaw Phone Internet matut mahkai lam ni dawm kau ai hpang Starlink wifi, IP star, K-net Wifi jak ni law malawng jai lang wa ai re.
Internet seng n nan hpaw ai aten hta hKying hkum mi kaw 20,000 kaw na 30,000 MMK jaw nna lang ra ai raitim n dai hpang daw de gaw hkying hkum mi kaw 3,000 kaw nna 5,000 MMK du hkra yawm wa ai re hte lu sha seng n kau hkan gaw Internet free mai lang ai madang byin wa ai re hpe mung chye lu ai.
コメント