Pajau Media
22.1.2025
Jinghpaw Mung kata Mung masa hpyen masa shut shanut wa ai hpang kaw nna Myitkyina ginra sha n-ga Mogaung, Mohnyin hte kagaginra ni hkan Dum nta shap manu ni grai rawt wa ai lam ginra masha ni tsun ai kaw na chye lu ai.
Jinghpaw mung kata ya aten gunrai manu ni mung rawt nga ai sha n-ga majan a majaw hpyen yen mung masha ni mung law wa ai hte kadai mung kadai shimlum dum ai Myitkyina ginra, Hopin, Mohnyin, Mogaung ginra ni de koi yen wa ai hta dum nta shap rawng ai masha law wa ai hte nta shap manu ni mung grai rawt wa ai lam chye lu ai.
Lai wa sai ten hta pe 10 grup yin nga ai gawk langai hpe (50,000), (60,000) daram hte mai shap rawng ai raitim ya aten (80,000), (100,000) daram nga nga wa ai lam,lai wa sai ten gat seng gawk langai mi sen lahkawng grup yin sha nga ai raitim ya aten sen masum lahta jaw ra sai lam chye lu ai.
Ya aten Muklum kata Nga shara gawk, Gat seng gawk shap manu ni lani hte lani tsaw wa ai masa hpe myiykyina ginra masha langai ya na zawn tsun ai re. “ Mung masa a majaw Muklum kaba de wa nga ai, gunrai manu gaw rawt, lai wa sai ten Mun manga jaw ra ai gawk langai ya gaw Sen mi du nga sai” nga nna dum nta shap rawng ai Mung masha langai tsun ai re.
N dai masa hta dai ni tam dai ni sha Mung masha ni hte asuya bungli galaw ai masha ni mung yak hkak nga ai lam, asuya magam gun ni hpe asuya kawn mung shata Lak hka jat jaw ai lam n nga ai majaw grau yak hkak ai lam asuya magam gun kawn mung ya na zawn tsun ai re.
“Shata mi lu ai kaji kajaw hte sha gaw jaw ra ai shara gaw law, n ta manu mung jaw ra, tinang lang na pyi n ngam , dai kaw gunrai manu gaw rawt rai na n loi nga ai”
Gasat Gala majan a majaw hkawm sa hkawm wa hkrun lam ni mung naw yak hkak nga ai majaw Jinghpaw mung kata gunrai manu ni grai naw rawt nga ai re, majan a majaw hpyen koi yen mung masha ni grai law wa ai hta Nga shara dum nta shap manu ni mung rawt ai majaw grau yak hkak lam ginra masha ni tsun ai re.
Shiga- hpring
Comments