Pajau Media Channel
1st July ,2024
Jinghpaw Mung Myitkyina, Waingmaw, Chiphwi ginra shara law law hta hka lim kaba wa ai majaw hka hpyen hkrum ai mung masha law wa ai re.
Marang ladu lai htu sawng ai majaw Mali Hka kaba shadang gaw tsang ra ai shadawn shadang hta lai mat ai re lam Myen mung du hkra ladaw maram masam rung kawn n dau da ai re.
Jinghpaw mung Hka Hku daw Putao, Chiphwi, Saw Law ginra ni hkan marang matut manoi htu sawng nga nna bum hka ni matut manoi kaba wa ai majaw Mali Hka kaba shadang mung matut manoi byin nga ai re.
Ya aten Myitkyina na ga nem ai mare lawk ni hkan Mali Hka kaba lim shang wa ai majaw hka hpyen hkrum ai ni law jat nga dingyang re hpe mung chye lu ai.
Myitkyina Shatapru lawk kaw na mung masha langai tsun ai hta, "Ya anhte Shatapru lawk gaw yawng lim sai. Anhte na n ta daw mi mung lim taw sai majaw n ta n tsa kaw sha nga ai, n dai hta kaba sai kaw na gaw grai yak sai ga re," nga n na tsun ai.
Myitkyina Myo Tit lawk shara n kau hkan mung hka lim kaba wa ai majaw pru lam n mu chyat rawng nga ai mung masha ni hpe hkye mawai na matu ra kadawn nga ma ai re.
Myitkyina ginra kata June 29 ya kaw nna Mali Hka kaba shadang gaw tsaw nga dingyang re hte lahkawng ya ram na ai hpang Myitkyina lawk hkan du hkra hka lim shang wa ai re hpe mung chye lu ai.
Ya aten Myitkyina lamu ga nem ai ginra ni rai nga ai, ကြက်ပေါင်ခြံ၊ အလယ်ကုန်း၊ ရမ်ပူ၊ မြေမြင့်ကွက်သစ်၊ မြို့သစ်ကြီး၊ စီတာပူ၊ စက်မှုဇုန် hte Waingmaw myo, Chiphwi ginra hkan na mung masha dum n ta law law, hka lim mat ai majaw hka hpyen hkrum ai masha law jat nga dingyang re hpe mung chye lu ai. Ya aten Myitkyina ginra kata marang mung matut manoi htu nga ai re majaw grai sadi maja let nga ra ai masa re hpe mung chye lu ai.
Comentários