Pajau Media
14.8.2024
Myitkyina-Danai Lido lam mayan jepjoi shagyit ni grai law wa ai hte hkawm sa hkawm wa gunrai htaw mawdaw ni hpe gumhpraw hta ai lam mung shawoi na hta grau law wa ai re lam mawdaw la ni tsun ai kaw na chye lu ai.
Myitkyina kaw na Danai de du hkra hkawm sa hkrun lam lapran KIA jepjoi shara langai hte myen hpyen dap a jepjoi shara (11), yawng rai yang jepjoi shara 12 du hkra nga ai rai nna jepjoi shara langai kaw yawm htum mun lahkawng kaw na mun manga lapran jaw kau da ra ai lam, deng 21 jepjoi shara kaw gaw sen lahkawng du hkra jaw ra ai lam chye lu ai.
Lanam ladaw re majaw Danai hkawm sa hkrun lam gaw shawoi na hta grau yak ai rai nna hkum pup nau chyat ai majaw mawdaw hpe Na Htu Jak ni, Backhoe mawdaw ni hte gang garawt la ra ai lam chye lu ai. Mawdaw gang garawt shaw la ai kaw mung mawdaw kaji kaba hta hkan nna yawm htum lap mun masum kaw na mun matsat, sen mi kaw na sen lahkawng du hkra jaw ra ai re hpe mung chye lu ai.
Ya aten jak sau manu ni rawt nga ai aten mawdaw la ni gaw Myitkyina hkrun lam lapran kaw sha yawm htum lap Sen 10 jan daram ma nna htaw sha ra taw ai lam mawdaw kaba hte gunrai htaw sha ai mawdaw la langai tsun dan ai kawn chye lu ai.
Comments