Pajau Media Channel
9th February,2024
Myen hpyen dap uphkang wa ai hpang kaw nna myo mare ka-ang zawn re hkan hpyen dap shara la nga ai re hte aten n tam sawk jep ai lam ni dingyang galaw nga rai nna mung masha ni kaw nna manu dan ai rung rai ni hpe mung mu yang mu ai hku zing la kau ya ai lam ni byin nga ai re.
Myen hpyen dap ni gaw aten ntam sawk jep ai lam ni a majaw myo mare kaba hkan shanu nga ai Mung masha ni myit shimlam n lu hkrit tsang let sha hkawm sa ra ai re. Lai wa sai Feb (4) ya shana hta mung Company rai dut bungli galaw ai la langai Myitkyina Shatapru Wa Baw lam hku aten hkying (10) daram hta lai wa yang Myen hpyen la marai (3) kawn hkap jahkring n htawm shi kaw lawm ai gumhpraw sen (40) jan hpe atik anang zing la kau ya ai lam dai gashun hkrum ai la wa tsun ai.
“N dai manghkang byin ai gaw lai wa sai Feb (4) ya shana rai nga, ngai lai wa yang Myen hpyen la marai (3) gaw ngai hpe hkap jahkring ai, mawdaw kata kaw hpa baw ni lawm ai nga san jep ai. Ngai hpe mawdaw kaw nna yu shangun ai, gumhpraw mu ai hte n dai gumhpraw ni gara kaw na lu ai, PDF ni hpe garum na matu n re i nga san jep ai, ngai mung atsawm tsun dan ai, n dai gaw company rai dut da ai gumhpraw re, rung de garai n ap shi ai re ngu tsun tim n hkap la ai, zing la kau ya ai re” nga nna tsun dan ai re.
Dai hpyen la ni gaw hpyen hking hte hkrak sanat lak nak ni mung hpai da ai re hpe mung chye lu ai. Myitkyina shatapru Wa baw lam ntsa kaw cycle, phone, gumhpraw sumbu gashun manghkang ni jahkring hkring byin nga ai re hpe mung chye lu ai. Lai wa sai Feb (6) ya shana daw hkying Mali jan daram hta shatapru lawk lam maw Masat (5) Hpaji jawng mayan lam kaw la langai lam makau kaw mawdaw jahkring nga yang wa ngan la marai mali sa wa nna gumhpraw sen (80) daram mya la kau ya ai manghkang byin lai wa sai re hpe mung chye lu ai. Mung masa shuk shanut nga ai aten lagut damya mung lani hte lani law jat nga ai re majaw myo mare kaba hkan hkawm sa hkawm wa grai sadi maja let hkawm sa ra ai re hpe mung chye lu ai.
Shiga -Kachin Pyi Tar
Comments