Pajau Media
13.11.2024
Myen mungdan kata Myen hpyen dap mungdan ahkaw ahkang zing madu la ai masum ning jan laman Myen hpyen dap a dingsa gasat ai majaw amyu shayi marai 1,300 hkawt asak si sum ai lam AAPP kawn November 12 ya shani n dau da ai re.
AAPP n dau da ai hta 2024 November 12 ya shani du hkra asak si sum ai amyu shayi 560 rai nna, 2023 shaning hta marai 402, 2022 ning hta marai 213 hte 2021 shaning hta marai 95 asak si sum lai wa sai lam tang madun da ai. Myen hpyen dap uphkang ai aten na magang mungdan kata mara kata amyu shayi ni asak si sum ai lam grau grau law wa ai re lam, Myen mungdan ting hta amyu shayi asak si sum law dik ginra gaw Sagaing ginra hta law dik re lam mung chye lu ai.
Ya na zawn mara kata amyu shayi ni asak si sum ai lam gaw hpyen shamu shamawt hkawm ai aten Mung masha ni hpe rim zingri sat ai lam, dum nta wan nat jahten ai lam, gasat gala n byin ai raitim lak nak kaba, nbungli bawm ni wa jahkrat bun ai majaw asak si sum law ai re lam mung chye lu ai.
Myen hpyen dap gaw Myen mungdan kata nga amyu sha lak nak lang hpung ni hpe simsa lam bawng ban ai masa hte Myen mungdan masa hpe hparan na matu saw shaga ai September shata hpang daw kaw nna mungdan kata nbungli bawm hte htim gasat ai lam grau galaw wa ai re. Myen mungdan ting hta Myen hpyen dap a majaw asak si sum ai Mung masha marai 5,944 nga ai hta amyu shayi 1,270 lawm ai lam n dau da ai re.
Commenti