Pajau Media
6th November ,2024
Sagaing jarit mayan Indaw ginra Myo Ma Hpung gyi Jawng kaw myen hpyen dap kawn Hpyen ninggang hku woi da hkrum ai Mung masha ni kaw nna amyu shayi n kau Myen hpyen dap a Mazut roi rip ai lam hkrum sha nga ai re hpe chye lu ai.
Myen hpyen dap gaw Mung masha ni hpe Hpyen ninggang shatai nna rim woi da ai lam ni galaw nga ai hta Mazut roi rip hkrum ai re lam rim hkrum ai kaw na lawt wa ai amyu shayi langai tsun ai.
“ya hprawng pru wa ai re Num sha ni hkrai marai (10) re, hpyen dap kaw ngam kau da ai amyu shayi ni mung law law re, Myen hpyen la ni gaw lani mi marai langai shaga la nna mazut roi rip ai re, amyu shayi langai gaw ngai kaw kasha hte madu wa nga ai lam tsun tim roi rip ngut ai hpang Shi madu wa hpe myit dik ai i ? ngu naw san shi ai” nga nna hkrap let tsun dan ai re.
Mazut roi rip hkrum ai amyu shayi ni hta dinghku hte re ai amyu shayi ni sha n-ga Non CDM magam gun ni mung lawm ai lam, N kau gaw hprawng lawt ai raitim naw ngam taw ai amyu shayi ni law law naw nga ai lam hpyen yen ni hpe garum ya nga ai Uhpung ni kawn tsun da ai re.
Hpyen ninggang hku rim woi da ai Mung masha ni marai 300 hkawt nga ai rai nna Lai wa sai August shata 16 daram hta Myen hpyen dap hte PDF lapran byin ai gasat gala majan laman Myen hpyen dap kawn pat shingdang da ai Mung masha ni re lam chye lu ai.
Myen hpyen dap kawn hpyen ninggang hku woi hkrum ai shata lahkawng daram na wa sai rai nna lani mi hta shat kalang sha jaw sha ai lam, shat kan si nna hkrap ai Ma ni hpe sinat hte hkrap n zim yang gap kau na ngu tsun jahkrit shama ai lam mung chye lu ai.
Indaw Myo Ma kaw nga ai Myen hpyen dap hta Malu masha ni grai taw wa ai rai nna mung masha ni a dumsu nga ni hpe gap sat sha ai lam ni galaw nga ai re nga nna, mung masha ni tsun ai hpe Kachin Pyi Tar shiga jaw da ai re.
Shiga -Kachin Pyi Tar
Comments