Pajau Media
3.12.2024
Puta-O Lungsha Yang makau hkan Myen Hpyen dap ni n-gun jat hpyen masa shamu shamawt ai nga ai hta hkawm sa hkawm wa Mung masha ni hpe Mung shawoi hta na grau galaw wa ai lam ginra masha ni tsun ai kaw na chye lu ai.
Myen hpyen dap gaw Puta-o Muklum kata Lung sha Yang hte makau grup ying kaw shim lam la shamu shamawt taw ai majaw Puta-o ginra hpyen majan byin wa na hpe myit tsang ai lam ginra masha tsun ai re.
“Shiga gaw a myu myu na taw nga ai hkawmsa hkawmwa jap ai ni shawoi hta na grau galaw wa ai ,ya gaw mam dan ten ma re ai na taw ai gaw mam ni dan ngut yang majan byin na ngu shiga ni pru taw nna tsang taw”
Ndai laman Puta-o kaw na Lungsha Yang de sa na kadai raitim mying hte mung chying masat hpe Hk.L.Y (46) Dap up hpe nan Mying jahpan jaw da ra ai ngu tsun ai re. Myen Hpyen dap ni Puta-o Muklum ginra shimlam ngu ai Ga baw hte hkawmsa hkawmwa mung masha ni hte mare masha ni hpe jep joi ai lam ni laja wa ai majaw yi sun hakuna galaw ai ni hkawm sa lam grai yak hkak wa ai lam chye lu ai.
Wunpawng mungdan shanglawt hpyen dap KIA /PDF pawng hpawng hpung ni Sumpra Bum Muklum hpe May shata hta yawng zing la sai hte tat sum kau ai Sumpra Bum bai lu la na hkra Puta-o Myitkyina maw daw lam Lungsha Yang the Hpak ma mare ni kaw hpyen n-gun jahpring ai ni hpyen masa grau shaja wa ai re hpe mung chye lu ai.
Myitkyina Puta-o Mawdaw lam kaba ntsa kaw nga ai Sumpyi Yang mare de Myen Hpyen Dap shara jahkrat nga wa ai majaw mare masha ni hprawng yen mat ai shata kru daram na wa sai hte ya aten du hkra buga de n lu wa shi ai re hpe mung chye lu ai.
Comments