Pajau Media
18 February 2025
Myitkyina Sumprabum lam hta lahkawng maga na hpyen shamu shamawt ai ni laja nga ding yang rai nna Myitkyina lahta Mali Hka makau Tang Hpare nawku jawng wang hta mung Myen hpyen dap kawn kaduk htu shara la nga nna hpyen shamu shamawt ai ni galaw nga ai hpe chye lu ai.
“Dai kaw shanhte ni nga taw ai gaw loi gaw na sai, nawku jawng wang kata kaw nga ai. Zaw hkat da ai chyinghka ni hpe ma zaw ni adut hpaw na shang nga taw nga ma ai. Nawku jawng wang kata kaw nga taw ai ni gaw hpyen ma ni nre, lahta na masha kaba ni re,” nga nna tsun ai re.
Mare masha ni tsun jahta ai gaw Tang Hpare mare kaw myen hpyen n-gun hkying hku nga ai hte dai hpyen n-gun ni gaw nawku jawng makau hkan nam maling kata hkan dap jahkrat nna hpyen masa shajin taw nga ai hpe chye lu ai.
Myen hpyen dap ni kawn lai wa sai February praw 3 ya shani kaw na Sumparabum sa ai mawdaw lam hkan hpyen htu shadut shamu shamawt nga nna lahkawng maga htim gasat ai lam ni mung jahkring hkring byin taw ai lam hpe chye lu ai.
Tang Hpare mare hta myen hpyen dap ni dap dung shara la nga nna February shata praw 15 ya shani du hkra mare makau hkan gasat gala majan matut byin taw nga ai re.
Lai wa sai February shata 12 ya shani hta mung Tang Hpare mare lahta Weshi mare hta dap shara jahkrat da ai myen hpyen dap ni a shara hpe KIA dap ni kawn Darone hte htim gasat lai wa sai re.
Dai hpang myen hpyen dap ni kawn Tang Hpare mare hta shara jahkrat dung da ai dap shara kaw na laiwa laisa nmai hkra pat da nna Weshi mare lahta hta laknak kaba hte bai ninghkap gasat ai hpe chye lu ai.
Shiga-Htu Seng
Comments