Myen Hpyen Dap N Bungli Bawm Laja Lana Gap Lapran Indaw Ginra Hpe KIA Zing Madu Sai Lam

Pajau Media

8.April .2025

Myen hpyen dap gaw April 2 ya kaw nna 22 ya laman htu shadut gap gasat majan gan jahkring ai lam n dau da ai raitim April 7 ya shani hta Sagaing jarit mayan Indaw ginra de n bungli bawm laja lana htim gasat nga ai lapran KIA pawng hpawm hpung ni kawn Indaw ginra hpe zing madu la lu sai lam chye lu ai.

Htu shadut majan gan jahkring ai lam n dau laman hta sha Jinghpaw Mung Manmaw ginra sha n-ga Indaw ginra de Myen hpyen dap n bungli bawm laja lana gap gasat ai re. April 7 ya shani hta mung Indaw kaw n bungli bawm 40 jan lang ram wa gap bun ai hta shana Hkying 8:00 PM aten daram hta gaw Indaw ginra hpe KIA pawng hpawm hpung ni zing madu la lu sai re hpe mung chye lu ai.

Indaw ginra hpe aten na na htu shadut gasat ai hta KIA,KPDF, ABSDF pawng hpawm hpung ni shang lawm ai hte htim gasat ai re lam, aten na na htim gasat ai hta laknak arung arai hpan hkum hte bawng masha ni mung lu rim ai lam chye lu ai.

Indaw ginra hpe Lai wa sai 2024 August 16 ya kaw nna KIA pawng hpawm hpung ni htu shadut htim gasat hpang wa ai shata 8 daram na ai hpang she zing madu la lu ai re lam shiga ni htang madun da ai. ya aten Jinghpaw Manmaw ginra de mung gasat gala majan matut manoi laja nga nga ai hta Myen hpyen dap maga kawn n bungli, drone ni hte shani shagu gap gasat nga ai re lam chye lu ai.

Shiga- Pyilan U