Pajau Media
26.11.2024
Myitkyina-Hpakant hkawm sa lam ntsa na Kamai Myen hpyen dap shagyit hta Jak Sau mawdaw ni hpe lai ahkang pat da ai majaw ya aten Hpakant ginra kata Jak Sau ni grai taw nga sai re hte Lung Seng htu Company ni bungli shang yak hkak wa na masa nga ai lam ginra masha ni tsun ai kaw na chye lu ai.
Hpakant ginra kata Jak Sau grai taw nga sai hte Jak Sau seng ni hku nna shadawn sharam na sha dut ya nga ai hpe gashun gashe rai mari la nga ai lam chye lu ai. Ya aten Hpakant Muklum kata Jak Sau 1 liter kaw lap 10,000, Ga Lan 1 hta lap 55,000 du hkra tsaw nga ai re hte Sau seng law malawng gaw pat nga sai re hpe mung chye lu ai.
Ya aten Hpakant shang wa ai Shan Ma Jak Sau seng(ရှမ်းမဆီဆိုင်) hte Lawng Hkang kaw nna Sin Phyu Daw Jak Sau seng (ဆင်ဖြူတော်ဆီဆိုင်) ni sha sharam nna dut ya nga ai masa re hpe mung chye lu ai. Myen hpyen dap kawn ya na zawn Jak Sau htaw Mawdaw ni hpe pat da ai a majaw Hpakant ginra lung seng htu ai company ni sha n-ga, Mung masha ni kaw na hkawt grai yak hkak wa ai maga de rai sai re hpe mung chye lu ai.
Aten galu Jak Sau taw yang lung seng dut hpaga galaw nga ai ni gaw lagaw lam hkawm nna galaw ra wa ai masa re hte dai zawn sha Myitkyina Muklum hte Waimaw Muklum ni hta mung Jak Sau taw ai mayak hkrum sha nga ai gaw bat mi hkawt rai wa sai re hpe mung chye lu ai.
Comments