Pajau Media
28.10.2024
Jinghpaw Mung ginra kata Myen hpyen dap kawn Internet line dawm kau ai hpang Myitkyina Muklum kata Starlink, Ip star wifi internet seng hpaw sha ai lam grai law wa ai hta ya aten lawk n kau hkan na seng ni hpe Myen hpyen dap kawn wifi jak rim zing ai lam galaw wa ai hpe ginra masha ni tsun ai kaw na chye lu ai.
Ginra masha ni tsun ai hta Mye Myit, Yuzana lawk, Ayar lawk hkan hpaw da ai internet seng n kau hkan Myen hpyen dap kawn sawk jep rim ai lam, Starlink wifi jak ni wa la kau ya ai lam ni galaw nga ai re nga nna tsun nga ma ai re.
Ya aten Myitkyina Muklum kata na lawk shagu ngu na daram hta Internet seng nga sai re hte Myen hpyen dap kawn rim ai lam ni nga wa ai majaw seng n kau gaw internet mai lang ai lam shakap da ai laika pa ni hpe dawm da ai lam ni nga ai hte seng n kau gaw rim ai lam shiga ni mawng nga ai majaw gan pat da ai lam ni galaw nga ma ai re hpe mung chye lu ai.
Ya aten Jinghpaw Mung kata gasat gala majan mung grai laja nga ai hte internet phone line dawm da ai mung lai wa sai July shata kaw na rai yang shata masum jan wa sai re hpe mung chye lu ai.
Comments