Pajau Media
8.1.2025
KIA Dap Ba (5), masat (3) Dap Dung ginra rai nga ai Waingmaw Lamyang mare mayan de Myen hpyen dap kawn kalang bai htu shadut wa ai majaw hpyen masa shaja hkat nga ai masa re lam ginra masha ni kaw na chye lu ai.
KIA pawng hpawm hpyen hpung ni zing madu da ngut sai Lamyang mare, Nang Zaw Yang mare maga de Myen hpyen dap hpyen n-gun kaba hte htu shadut lung wa ai sha n-ga lak nak kaba aten n tam gap bang ai lam mung chye lu ai.
“Chaung Sone hte Lamyang, Nang Zaw Yang kaw na nau n tsan sai. Sinat nsen pyi na lu ai. Shani hkan gaw nau n na ai, shana grau na ai,” nga nna Chaung Sone mare masha langai tsun ai re.
Lai wa sai January 3 ya shani shana daw hkying 4:00 PM aten daram hta Waingmaw Lamyang mare maga de hpyen n-gun (70) daram lawm ai Myen hpyen hpung ni gaw KIA hpyen hpung ni shara la nga ai Lamyang mare maga de htu shadut wa ai majaw gasat gala majan byin ai lam chye lu ai.
Dai kaw nna matut manoi Lamyang, Nang zaw Yang hte Washawng mare maga de shani shagu hpyen shamu shamawt ai lam nga nna Waingmaw ginra maga de hpyen man hpaw na masa nga ai lam Mung masa maram masam nga ai ni tsun da ai re.
Chaung Sone ginra masha langai tsun ai hta Lamyang mare kaw Drone, laknak kaba ni gap shadam ai majaw Mung masha ni a dum nta htenza mat nna Mung masha n kau Chaung Sone mare maga de hprawng yen wa ai lam ni nga ai re hpe mung chye lu ai.
Maga mi de Myen hpyen dap gaw Waingmaw, Hk.L.Y (58) Dap makau de dap jung nna hkawm sa hkawm wa lam pat da ai sha n-ga Mali hka lai di ai hkali lam ni, Hkat Cho, Nawng He jak li daru ni hpe mung ya aten du hkra pat da nga dingyang re.
Waingmaw hpyen yen Mung masha ni koi yen shanu nga ai Nawng Hkying mare Jak li daru hpe mung pat da ai majaw gasat gala majan byin wa yang pru lam n nga, chyat mat na masa hpe Mung masha ni grai myit tsang nga ma ai re hpe mung chye lu ai.
Shiga – Nyoi
Comments