Pajau Media
17th September, 2024
Myen Mungdan ting hta Myen hpyen dap Mungdan ahkaw ahkang zing madu ai hpang Myen hpyen dap hpe ninghkap n ra sharawng ai lam Ganghkau laika man hkan ka mara ai lam, Rawt Malan hpung ni hpe madi shadaw ai lam law wa ai hte Myen hpyen dap gaw ga baw amyu myu shadut nna rim ahkyak la hkrum ai marai 1,691 du hkra nga wa sai lam Data for Myanmar n dau da ai kaw na chye lu ai.
Rim ahkyak la hkrum ai lam grau sawng wa ai gaw 2022, 2023 shaning laman grau law jat wa ai rai nna 2024 hta gaw rim hkrum ai masha yawm wa ai lam tang madun da ai. Rawt malan hpung ni hpe madi shadaw ai majaw rim hkrum ai Mung masha gaw 2022 shaning hta marai 874, 2023 ning hta marai 615 hte 2024 July shata du hkra gaw marai 202 nga ai lam tsun da ai re.
2022 February kaw nna 2024 July shata htum du hkra rai yang Myen mungdan ting a ginra 220 kaw byin nga ai rai nna rim hkrum ai masha law malawng gaw Yangon hte Mandalay ginra hkan na marai 806 daram lawm ai lam chye lu ai.
Rim hkrum ai ni law malawng gaw Facebook, TikTok, Telegram, Viber ni hku nna Myen hpyen dap hpe nra sharawng ninghkap ai lam ka mara, shada tsun jahta hkat ai laika ni a majaw rim hkrum ai rai nna shata shagu marai 54 daram gaw rim hkrum nga ai masa re nga nna Data For Myanmar tsun da ai re.
Myen hpyen dap Mungdan ahkaw ahkang zing madu ai hpang Mung shawa kasu kabrawng ai lam hpe grau n-gun ja shangun ai Social Media hpe Jum tek na matu Myen hpyen dap hku na lam amyu myu hku shakut nga ai rai nna Internet dawm kau ai lam, Facebook n mai jai lang hkra pat shingdang ai lam ni galaw nga ai re hpe mung chye lu ai.
Myen hpyen dap gaw 2022 January 25 kaw nna Social Media jai lang ai lam ni hpe jahkrit shama ai lam, Myen hpyen dap hte n htan shai ai laika ka mara ai zawn re ai ni hpe Tara Upade amyu myu shadut nna rim ahkyak la nga ai gaw 2024 July shata daram du hkra rai yang rim hkrum ai masha hkying lahkawng hkawt nga sai re. Myen hpyen dap gaw aten ntam lai wa lai sa Mung masha ni hpe kajawng kaja hkap jahkring Phone jep ai zawn re ai ni dingyang na galaw nga ai re hpe mung chye lu ai.
Comments