Pajau Media
September 26, 2024
Jinghpaw Mung Waimaw ginra kata September shata laman KIA pawng hpawm hpung ni hte Myen hpyen dap lapran gasat gala majan jahkring hkring byin ai re hte P.T.Ts hpung ni gaw dum nta hkan shang nna manu dan ai arai ni hpe kam ai hku la jahten sharun ai lam ginra masha ni tsun ai kaw na chye lu ai.
Waimaw ginra kata naw ngam nga ai Myen hpyen dap HK.L.Y (58) Dap makau mayan hte Mali hka hkinggau mayan ni hta gasat gala majan jahkring hkring byin nga ai rai nna Myitkyina Muklum hkran de nga ai Myen hpyen dap kawn lak nak kaba hkrup mara gap shadam ai lam ni galaw nga ai re hpe mung chye lu ai.
“Shana shagu ngu na daram hkying 9 hte 10 lapran laknak kaba gap n sen ni grai na ai, gara de gap ai kun ngu yang Waimaw maga de gap bun ai rai nga, kalang marang jahpawt jau aten hkan mung na lu ai. September shata laman gaw dingyang ngu na daram na taw nga,” nga nna Myitkyina ginra masha langai tsun ai.
Waimaw Shwe Nyawng Pin Mare na HK.M.Y (321) dap hte Myen hpyen dap shara law law hpe KIA pawng hpawm hpung ni htim gasat zing madu ai hpang Myitkyina Muklum nga M.P.Hk kaw nna lak nak kaba dingyang gap bun ai lam galaw nga ai re hpe mung chye lu ai.
Gasat gala majan gaw shani shagu byin nga ai rai nna Wuyan P.T.Ts hpung ni gaw Mung masha ni yen kau da ai dum nta hkan shang nga nna manu dan ai arung arai ni hpe kam ai hku shaw la nga ai re hte dum nta n kau gaw zaw pat da ai raitim zaw adup jahten kau ya nna arung arai ni shaw la ya ai lam ni galaw nga ai re.
Waimaw -Sadung sa lam ntsa kaw nga ai Washawng mare, Tangbau mare hte Labang mare ni gaw P.T.Ts dap hte ni htep ai shara ni rai nna Waimaw ginra kata Mung masha n nga ai dum nta ni law law naw nga ai lam Mung masha ni tsun ai re. Waimaw ginra majan laja wa ai majaw lai wa sai May shata daram kaw nna Mung masha ni gaw kadai mung kadai chye ai de hprawng koi yen mat ai re hpe mung chye lu ai.
KIA pawng hpawm hpung ni kawn htim gasat majan baw ai hpang Myen hpyen dap shara law law hpe zing madu la lu sai re hte Myen hpyen dap gaw tat sum kau ai shara ni hpe bai lu la hkra September shata laman kawn hpyen n-gun jat let shamu shamawt ai lam ni galaw nga ai re hpe mung chye lu ai.
Comments