Pajau Media
20.11.2024
Jinghpaw Mung ginra kata ya aten gasat gala majan laja nga ai hte KIA pawnghpawm hpung ni htim gasat zing da ngut sai shara ni hkan du hkra Myen hpyen dap kawn nbungli bawm jahkrat ai lam ni matut manoi galaw nga ai masa gaw Myen mung simsa lam hte grai tsan shangun ai lam KIO shiga magam dap lithkam tsun da ai re.
Maga mi de Myen hpyen dap gaw Rawt Malan Hpung ni hpe Mung masa bawng ban ai lam galaw na matu tsun shadut saw shaga nga ai raitim ta tut hta gaw Mung masha ni hpe masat shingte tawn htim gasat ai lam matut manoi galaw nga ai re. N dai masa hku rai yang Myen mungdan simsa lam de du lu na gaw grai naw tsan nga shangun ai masa re.
Myen hpyen dap gaw Rawt Malan Hpung ni htim gasat zing madu la ngut sai shara ni hkan gasat gala majan n nga ai raitim nbungli bawm wa jahkrat bun ai majaw simsa sai ngu nna dum nta de wa nga sai Mung masha ni gaw nbungli hpyen hpe sha grai hkrit tsang ai lam Sumpra Bum ginra masha langai mung tsun ai re.
“Gasat zing la ngut nna buga de bai wa nga taw sai raitim kaga ra kadawn ai lam ni hta nbungli hpyen hpe tsang dik ai. Malu masha hte kaga ra ai lam ni hpe lit nga ai Shang Lawt Asuya kawn lit la ya ai re majaw nbungli hpyen hta lai nna kaga myit tsang ai lam n nga ai.”
N dai laman hta grau Rawt Malan Hpung ni zing madu da ai shara ni hkan nbungli bawm wa jahkrat bun ai lam matut manoi galaw nga ai re hte, November 15 ya shani hta mung KIA kawn zing madu da ai Myotit Kung Law mare kaw jet nbungli lahkawng hte bawm wa jahkrat ai majaw Mung masha marai 7 asak si sum nna hkala hkrum ai Mung masha law law nga ai lam chye lu ai.
Asak si sum ai hta ma kaji ni law malawng re ai hte November 17 ya shana yup tung aten hta mung TNLA uphkang ginra Kuthkai lawk 4 kaw nbungli bawm a majaw ma kaji hte marai 3 asak si sum nna marai 13 hkawt hkala sawng ai lam nga sai re.
KIA pawng hpawm hpung ni gaw Jinghpaw mung kata nga ai Myen hpyen dap dap shara ni hpe zing madu majan hpang wa ai hpang Miwa jarit mayan hte Jinghpaw mung kata na Myen hpyen dap shara law law hpe zing madu la lu sai raitim Myen hpyen dap gaw gasat gala majan n nga ai shara hkan masing nga dingsa gasat nga ai majaw grai sadi maja let nga ra ai masa byin nga ai re.
Comentarios