Pajau Media Channel
13.9.2024
Jinghpaw Mung Waimaw Muklum hte myitkyina Muklum kata mare kahtawng, Lawk ni hkan Myen hpyen dap, P.T.Ts hpawng hpawm hpyen hpung ni gaw Mung masha hte ni gahtep ai ginra hkan shara jahkrat ai lam grai galaw wa ai majaw Mung masha ni grai myit tsang lam law nga ma ai re.
Waimaw Muklum Lamyang mare kaw nga ai akyu hpyi Bum mayan de myen hpyen dap Hk..L.Y 58 Dap hte Wuyan mare kaw daju ai P.T.Ts hpung ni kawn hpyen n-gun jat shamu shamawt ai lam grai galaw wa ai re. Myen hpyen dap kawn Jinghpaw mung kata Internet, Phone line dawm kau ai hpang kaw nna hpyen n-gun jat shamu shamawt hkawm ai lam ni grau galaw wa ai hte shanhte kam ai shara hkan dap shara hkrat nga wa ai lam ni grai galaw wa ai re hpe mung chye lu ai.
Hpyen n-gun jat shamu shamawt hkawm nga ai myen hpyen dap hpe KIA pawng hpawm hpyen hpung ni kawn hkap gasat ai lam ni galaw ai majaw lahkawng maga hpyen masa grai shaja hkat ai masa rai nna Wuyan P.T.Ts jep joi shagyit mayan hta mung kalang marang hkrun lam pat, lai wa lai sa mung masha ni hpe jep joi ai lam ni galaw nga ai re hpe mung chye lu ai.
Dai zawn sha September 11 ya hta mung myitkyina Deng 10 Nawng Nang mare kaw mung Hpyen n-gun 30 daram nga ai Hpyen hpung ni gaw mare hkan shara la shamu shamawt ai lam nga ai re hpe mung chye lu ai.
Nawng Nang mare kaw shamu shamawt wa ai Hpyen hpung ni gaw Hkali hka Mazup lahta maga de na yu wa ai hpyen hpung ni ree lam mung chye lu ai. Jinghpaw Mung kata Phone, internet Line ni dawm kau ai hpang Myen hpyen dap gaw hpyen shamu shamawt lam grau galaw wa ai re hte Mung masha nga ai mayan de shara la na matu hkyen ai lam grai galaw wa ai majaw ginra masha ni grai myit tsang wa ai re hpe mung chye lu ai.
Kommentare