Pajau Media
19.11.2024
Myen hpyen dap gaw gasat gala majan n nga ai shara hkan raitim nbungli bawm jahkrat ai lam matut manoi galaw wa ai hta November 17 ya shana yup tung aten Sam Mung dingdung daw Kuthkai kaw nbungli bawm wa jahkrat ai majaw Mung masha marai 3 asak si sum ai sha n-ga hkala sawng ai masha law ai re hpe mung chye lu ai.
“Shana yup tung aten bawm wa jahkrat ai, Kuthkai lawk mali Miwa nawku jawng makau kaw re, lahkawng ning re ai ma hte kanu, asak 60 ning re ai salang langai asak si sum ai, hkala ai sawng ai masha 13 lahta nga ai, dum nta mung 5 daram hten mat ai,” nga nna Kuthkai Mung masha langai tsun ai re.
Mung masha ni nga ai ginra de kajawng kaja bawm wa jahkrat bun ai ni galaw nga ai majaw ya aten Kuthkai ginra uphkang nga ai TNLA kawn gaw masha hpawng chyawm ai lam ni n galaw na hte hpyen masa sadi maja na matu n dau ai lam hpe November 18 ya jahpawt daw hta sadi maja n dau ai lam ni galaw ai re.
Ya aten gasat gala majan a majaw hpyen koi yen Mung masha ni shanu nga ai Myo Thit Kung Law kaw mung November 15 ya shana daw hta nbungli bawm wa jahkrat ai majaw ma marai 7 hte asak 30 jan re ai amyu shayi hte amyu shadang lahkawng asak si sum mat ai mabyin nga lai wa sai re.
Myen hpyen dap gaw maga mi de Mungdan ting ra lata poi shang nna Mung masa hpe bawng ban jahkrup ai ladat hte hparan na matu tsun nga ai raitim maga mi de hpyen nbungli ni jai lang nna Mung masha ni nga ai ginra de hkrup mara gap bun ai lam ni galaw nga ai re.
Myen mungdan kata Myen hpyen dap uphkang wa ai hpang kaw nna 2024 shaning ka-ang daram du hkra nbungli htim gasat ai lam 2,500 lang daram galaw ai lam, dai hta nawku makam masham hte seng ai dum nta 204, tsi rung tsi gawk 57, hpaji jawng 207 daram nbungli bawm a majaw htenza mat ai lam NUCC kawn mung n dau da lai wa sai re.
Comentários