Pajau Media
13.1.2024
Jinghpaw Mung kata Myen hpyen dap hte KIA pawng hpawm hpung ni lapran gasat gala majan hta Myen hpen dap gaw tat sum kau ai ginra ni law wa ai sha n-ga gasat gala n byin ai shara ni hkan du hkra nbungli bawm gap bun ai lam ni grau galaw wa ai re hpe chye lu ai.
January (11) ya shani hkying 11:50 Am aten daram Danai ginra kata na Tsan Lun ja maw kaw Madalay (The Tar U) တံတားဉီး kaw na rawt wa ai nbungli hte 2 lang sa gap bun ai majaw Tsan Lun ja maw gat len kaw gat dut, galaw lu galaw sha nga ai Mung masha ni asak si sum ai hta asak 1 ning re ai Ma hte rai yang yawng marai (18) asak si sum lai wa sai re hta marai 10 hkala sawng nna Tsan Lun tsi jaw gawk kaw sha tsi tsi hkamla nga ai re hpe mung chye lu ai.
Ya aten Danai ginra hta gasat gala majan gaw n nga ai raitim ya na zawn nbungli hte wa gap bun ai majaw Gat Seng (9) mung hten za mat ai lam nga sai re. Myen hpyen dap gaw Myen mungdan simsa lam lu na matu Mung masa mahkrun hte bawngban jahkrup mahtai tam yang she awng dang lam lu na re nga nna simsa lam bawngban na matu lang hte lang saw shaga ai lam nga ai raitim nbungli bawm gap gasat ai lam grau grau galaw nga ai re.
Ya aten nbungli hte dingsa gasat hkrum ai Danai ja maw ginra kata nbungli bawm tsang ra ai majaw nbungli hpyen maja nna sha galaw lu galaw sha ra ai masa re lam ginra masha ni tsun ai re.
January 8 ya shana hta sha Hpakant dung 6 ginra de Myitkyina kaw na lung wa ai Myen hpyen dap Jet nbungli langai hte bawm lahkawng lang wa jahkrat bun ai majaw asak (45) ning grupyin re ai Jan Lu Pan asak si sum mat nna gat seng ni hten za mat ai lam mung nga sai re.
Shiga- Hugawng
Comentarios