Myen Hpyen Dap Atik Anang Hpyen Magam Gun Shaga Wa Ai Masa Kaw Na Ramma Ni Koi Yen Hkawm Ra Nga Ai Lam

Pajau Media Channel

31st March, 2024

Myen hpyen dap gaw mungdan masha shagu hpyen magam n gun n mai upadi shagrin ai hpang nta di laika shadu ai ladat gaw Putao ginra hte myen mungdan ting ngu na daram galaw wa ai majaw asak ram ai ramma ni law malawng gaw dum nta kaw n gwi nga hprawng hkawm nga ma ai re hpe mung chye lu ai.

Myen hpyen dap kawn nta di di shaga laika shadu wa ai lam hte seng nna mare uphkang salang ni gaw hpa n chye lawm ai, gara hku tsun ninghkap mung n mai, dai majaw tinang na masing hte tinang koi yen hkawm ai hta lai nna kaga mahkrun n mu sai nga nna ramma kanu kawa ni mung myit ru myit tsang let tsun nga ma ai re.

March (25) ya shani hta mung Lung Sha gaiwang kata hta dum nta di di laika shadu wa ai lam galaw ai majaw ramma ni gaw mare kata kaw kadai n gwi nga taw sai lam ginra masha langai tsun ai.

“Lung Sha Yang gaiwang kata nga mare kahtawng ni hkan na asak (30-35) lapran na ramma marai (83) hpyi da ai lam nga ai, mying jahpan lawm ai ni law malawng gaw mare kaw n nga ai, jawng sara, hpung magam gun zawn re ai ni, npyen n jawn re ai ni a mying jahpan mung lawm nga ai, myen hpyen dap gaw gara hku maw nga ai ngu hpe kadai mung nlu tsun ai, tsun da ai hte maren tup hkrak galaw ai lam n nga ai re majaw gara asak pang ni hpe bai shaga wa na ngu hpe gaw n lu tsun ai, mare kaw gaw ma kaji hte gumgai dingla ni sha nga taw sai.”

Mare kata kaw ramma ni gaw n nga ai daram re sai hte dai ginra na mung masha ni gaw yi sun hkau na madung galaw sha ai re. Raitim atsam rawng ai ramma ni mare kaw n gwi nga nna hprawng koi yen hkawm nga ai aten ni na wa yang gumgai dingla ni hkrai galaw lu galaw sha lam grai yak hkak wa na hpe myit tsang nga ma ai re.

Putao myo kata ya aten shana de hkying (7:00) p.m. hpang de pru hkawm ai lam tsep kawp n galaw na matu, lawk shagu hta n dau da ai lam nga ai re hte n dai masa lapran myen hpyen dap hta magam gun na matu mying jahpan lawm ai ramma ni hpe nta di di wa shaga na hpe ramma law malawng hkrit tsang ai majaw kadai mung kadai chye ai ladat hte hprawng koi yen hkawm nga ma ai lam Mali Hku shiga shana wa ai.

Shiga - Mali Hku