Pajau Media
26.9.2024
Myen mungdan kata lak nak lang Rawt Malan hpung ni htu shadut htim gasat majan hpang wa ai kaw nna Myen hpyen dap tat sum kau ai shara ni law wa ai hte tat sum kau ai shara ni hpe bai lu la hkra nbung lam hku Jet n bungli bawm jahkrat bun ai lam laja lana galaw wa ai re hpe mung chye lu ai.
September praw 3 ya shani Myen hpyen dap ningbaw tsun ai hta htu shadut htim gasat majan laman tat sum kau ai Myen hpyen dap shara ni hpe bai zing madu la hkra htim gasat sa wa na lam tsun ai hpang amyu sha lak nak lang rawt malan hpung ni nga ai ginra de hpyen nbungli hte laja lana htim gasat wa ai re hpe mung chye lu ai.
September 26 ya jahpawt hkying 7:00 Am aten daram hta mung AA kawn zing madu da sai Than Twe Muklum hpyen koi yen mung masha ni nga ginra de Jet nbungli wa jahkrat bun ai majaw Mung masha marai (14) asak si sum nna marai (25) hkala sawng ai re lam, si hkala hkrum ai law malawng gaw Ma kaji hte amyu shayi ni law malawng re nga nna AA tsun ahkang lu salang tsun da ai re hpe chye lu ai.
Myen hpyen dap gaw Mung masha hte hpyen hpe garan ginhka ai lam n nga, lak nak kaba gap shadam ai lam, nbungli bawm hkrup mara jahkrat bun ai lam ni galaw ai majaw rawt malan ginra kata nga ai Mung masha ni si hkala hkrum ai lam law wa ai re hpe mung chye lu ai.
Ya aten Myen mung lawu daw ginra ni hta hka hpyen laja lana hkrum sha nga ai aten raitim rawt malan hpung ni nga ai ginra kata nbungli bawm jahkrat bun ai lam, hpyen n-gun jat shamu shamawt ai lam ni dingyang galaw nga ai re hpe mung chye lu ai.
September praw kaw nna September 26 jahpawt maga du hkra rai yang Myen hpyen dap gap jahkrat bun ai nbungli bawm a majaw Mung masha marai 138 asak si sum nna hkala hkrum ai masha marai 123 nga sai lam ginra shiga ni hta tang madun da ai re. Myen hpyen dap kawn nbungli bawm laja lana jahkrat bun ai ginra ni gaw Sam Mung dingdung daw ginra, Rahkai Mung ginra, Mandalay, Magwe ginra hte Sagaing ginra ni hta re lam chye lu ai.
Comments