Pajau Media
21.1.2025
Myen mungdan kata 2024 laning mi laman Myen hpyen dap kawn N bungli bawm sha n-ga dingsa gasat ai lam amyu myu a majaw Mungdan kata asak si sum ai amyu shayi (478) assak si sum ai sha n-ga Marai 412 hkala hkrum ai lam Burmese Women’s Union kawn January 20 ya shani n dau ai lam nga ai re.
Asak si sum ai 400 jan kaw Myen hpyen dap n bungli bawm a majaw sha n-ga, Lak nak kaba gap ai lam, Hkam bawm hte mazut roi rip ai lam ni a majaw asak si sum ai ni mung lawm ai lam tang madun da ai re. BWU a tang madun da ai lam gaw Ginra kata na shiga kaw na gahkyin la lu ai jahpan ni hte ta tut byin ai ginra kata na sawk gahkyin da lu ai ni re lam mung chye lu ai.
Myen hpyen dap dingsa gasat ai majaw asak si sum law dik ginra ni gaw Sagaing ginra kata marai (109), Sam Mung ginra hta marai (92) hte Rahkai Mung ginra kata hta gaw marai 83 re hte ngam ai gaw Kaga ginra hkan na re lam tang madun da ai. Ya na zawn amyu shayi ni asak si sum law wa ai masa gaw Myen hpyen dap kawn Mung masha ni hpe masat shingte tawn gasat ai lam, gasat gala majan hta Mung masha hpe hpyen ninggang shatai ai lam re lam, asak si sum ai amyu shayi ni law malawng gaw asak 25 lahta ni law ai lam mung tsun da ai re.
Myen hpyen dap Mungdan Uphkang masa gashun ai 2021 kaw na rai yang amyu shayi asak si sum lam gaw laning hte laning law wa ai re tang madun da ai re. Myen mungdan kata Myen hpyen dap a majaw amyu shayi ni asak si sum ai lam, shinggyim ahkaw ahkang tawt lai hkrum ai masa lam hte seng nna Mungkan Mungdan kawn myen hpyen dap hpe Ja ja ahkayak la ai lam galaw na matu amyu shayi ahkaw ahkang makawp maga hpung ni hpyi shawn nga ma ai re hpe mung chye lu ai.
Shiga _ Pyilan U
コメント