Pajau Media
26.11.2024
Myen Mungdan Kata Myen hpyen dap zing madu uphkang ai masum ni jan laman Myen hpyen dap hte shi a npu kaw nga ai uhpung uhpawng ni a majaw htenza hkrum ai Mung masha dum nta 101,474 du hkra nga sai lam data for Myanmar kawn n dau da ai re hpe mung chye lu ai.
Laning hte laning Mung masha dum nta jahten hkrum ai masa gaw grau grau law wa ai hte Mungdan ting masa hku rai yang tsa lam shadang 69% du nga sai lam tang madun da ai re. 2021 shaning hta gaw Mung masha dum nta 2,111, 2022 shaning hta gaw 46,856, 2023 shaning hta gaw 31,484 hte 2024 August shata du hkra rai yang dum nta 21,023 du hkra wan hkru hten za mat ai re lam chye lu ai.
N dai masa hpe yu yang 2022 December shata hta dum nta htenza hkrum ai lam law dik rai nna shata mi laman hta sha nta 10,562 hten za hkrum ai lam tang madun da ai re.
Myen hpyen dap Mungdan hpe uphkang ai masum ning jan laman Mungdan kata rawt malan hpung ni hte Myen hpyen dap lapran gasat gala majan grau laja wa ai rai nna Myen hpyen dap kawn mung nbungli bawm jahkrat ai lam, lak nak kaba hkrup mara gap bun ai majaw hten za ai lam grau law wa ai re hpe mung chye lu ai.
N dai masa lam ni a majaw hpyen koi yen ai Mung masha sen kaba nga sai hte ya aten hprawng yen nga ai Mung masha ni gaw shinggyim nau na karum ningtum lam ni grai ra ahkyak nga ai lam Data for Myanmar kawn tang madun da ai re hpe mung chye lu ai.
Commentaires