Pajau Media
3.12.2024
Myen hpyen dap gaw hpyen yen mung masha ni koi yen nga ai Nawnghkyi ginra de December praw ( 1 ) hkan kaw nna shara la shamu shamawt ai hta hte praw ( 2 ) ya shani ka-ang aten Ga Ra Yang hpyen yan mung masha ni shing nu nga dabang de shang wa nna dabang lit hkam hpe shaga woi nna jep joi ai lam chye lu ai.
“ Dai ni shani ka-ang hkan e hpri gang palawng hpun da ai hpyen la langai dabang kata shang wa nna dabang lit hkam hpe shaga woi mat ai, dabang kaw gara hku nga taw ai ni,masha jahpan kade nga ai, dabang kata KIA ni shang nshang san jep ai,shang wa ai shaloi dabang sumla hpe mung sumla dem mat ai, dabang lit hkam hpe gaw san jep la nna bai dat dat ai” nga nna hpyen yen mung masha ni tsun ai.
Myen hpyen dap ni ndai laman Waimaw ginra maga hpyen n-gun jat jahpring nna hpyen masa shamu shamawt ai lam nga ai, Nawnghkyi lam ding yan shara la du shang wa ai lam ni nga ai majaw hpyen yen mung masha ni a shim lam grai tsang ai lam matut tsun ai.
“Nawnghkyi maga de simsa ai majaw hpyen yen ni sa yen nga taw re ,ya gaw dai maga de myen hpyen dap ni hpyen mawdaw (7) ram hte Shang sahra la taw sai,Dai maga de shing lum lam nnga sai ,majan byin na hpe sha tsang ai hprawng yen shara gaw n nga grai tsang ra nga ga ai” nga nna tsun ai.
KIA pawng hpawng hpung ni htu shadup htim gasat ai March shata praw(7) ya shani kaw na hpang ai majan a majaw Waimaw ginra hte makau grup ying na mung mare masha ni gaw Nawnghkyi maga de yan shingnu nga ai re, Ya aten Nawnghkyi lam ding yan myen hpyen Dap ni shala la wa nga ai majaw hpyen gasat wa na hpe mung masha ni tsang taw nga ai lam hpe chye ai.
Comentarios