Myen Ausya Hpyen Dap Mungdan Ahkaw Ahkang Madu La Kau Ai Hpang Kaw Nna Waingmaw Ginra Mayan Wanglu Wang Lang Ka-Ni Lu Sha Jai Lang Masha Law Wa

Pajau Media Channel

Myen mungdan a uphkang masa hpe Myen asuya hpyen dap gashun madu la ai hpang kaw nna Waingmaw ginra mayan hta Ka-ni nanghpam lu sha jai lang ai masha ni gaw lani hte lani grau law wa ai hte wang lu wang lang lu sha jai lang law wa ai re lam ginra masha tsun ai.

Grau nna Waingmaw Hka Tan Lawk mare lam hte Gaw din Pa hkan dingyang ngu na daram mu mada taw ai re lam chye lu ai. Myen mungdan hpe hpyen dap uphkang wa ai hpang kaw nna mungdan kata galaw lu galaw sha yak hkak, bungli taw wa ai masa lam ni gaw asak ram ai ramma ni hpe lam dam shangun ai masa re hte asak ram ai ni gaw nanghpam mayam tai mat ai masa re lam yi sun galaw sha ginra masha langai matut tsun dan ai re.

“Myen mungdan masa a majaw kashu kasha ni mung yawng lam dam, hpa galaw sha mung n mai majaw n kau gaw kalang lahkawng lang chyam ai hte shanang mat ai ni law ai, nta na dingla wa mung Ka-ni lu sha ai, shi hpe kasha ni hpe n kam mu shangun ai. Ma ni jawng sa mat ai hpang she nta de du wa wa re ai” nga nna tsun ai.

2021 shawng daw hta gaw ka-ni nanghpam hte seng nna lu sha, dut sha ai ni hpe ahkaw ahkang lu ai asuya kawn rim zing ai zawn re ai lam ni galaw ai raitim Myen ausya hpyen dap ahkaw ahkang lu ai hpang kaw nna Ka-ni dut sha, lu sha masha ni gaw lam n tsa hkan du hkra kam ai hku dut mari lu sha ai lam grau law wa ai re lam ginra masha langai ya na zawn tsun ai.

“Myen mung hpyen dap lata n du shi ai aten hkan nga yang balik ni hkan rim ai lam ni nga ai majaw galaw sha ai ni mung lagu lagyim rai galaw sha ma ai, ya gaw kadai mung lit n la ai re majaw lam ntsa hkan kam ai hku she re, asak naw ram ai la kasha ni grai law ai” nga nna tsun dan ai re.

Lai wa sai aten hta gaw Ka-ni nanghpam PJS ai magam bungli hpe Nawku makam masham buga hpung ni kawn mung lit la nna galaw ai re, raitim n dai hpang daw de Myen mungdan uphkang masa htenza mat ai re majaw Ka-ni nanghpam pat jatsan ai magam bungli hpe ta tut bungli shang ai ladat hte n mai galaw ai masa lam ni a majaw Ka-ni nanghpam dut mari lu sha ai ni gaw wang lu wang lang galaw sha wa ai masa re lam mung chye lu ai.

Shiga -Bungshi